Эрхүү мужийн Лена мөрөнд танкерууд мөргөлдөж, гол руу бензин асгарчээ
Эрхүү мужийн Лена мөрөнд хоёр танкер мөргөлджээ. Эдгээр танкерийн нэг нь 800 гаруй тонн бензин тээвэрлэж явсан бөгөөд шатахуунтай сав гэмтсэн гэж ТАСС агентлаг мэдээлжээ.
Эх сурвалжийн мэдээлснээр, ТР-901, ТР-900 танкерууд Алексеевск суурингийн орчимд мөргөлдсөн байна. ТР-900 танкер 832 тонн бензин тээвэрлэж явсан бөгөөд мөргөлдсөний дараа 138 тонн шатахуунтай нэг сав нь цоорсноор шатахуун гол руу урсан оржээ.
Лена мөрөнд болсон ослын шалтгааныг тодорхойлохоор хэргийн газарт мөрдөгчид, криминалистууд ажиллаж байгаа гэнэ. Мөн тээврийн аюулгүй байдлын салбарт зөрчил гаргасан, ажил гүйцэтгэх үедээ хүрээлэн буй орчныг хамгаалах журмыг зөрчсөн гэсэн заалтуудаар хэргийг шалгаж байгаа аж. Танкерууд мөргөлдсөн бүс нутагт онц байдал тогтоож, иргэдийг Лена мөрний уснаас ашиглахгүй байхыг анхааруулжээ
Г.Бямбасүрэн
СЭТГЭГДЭЛ БИЧИХ