АНУ-ын судласнаар, Хойд Солонгос валютын орлогынхоо тал хувийг цахим халдлагаас олдог, цахим халдлага нь энэ улсын зэвсгийн хөтөлбөрийг санхүүжүүлэх чухал эх үүсвэр болдог гэнэ. Энэ талаар Nikkei мэдээлжээ.

Хэвлэлд мэдээлэл өгсөн, Америкийн өндөр албан тушаалтны өгүүлснээр, Пхеньянаас ирж буй цахим аюул занал Сингапурт болсон аюулгүй байдлын бага хурлын гол сэдвүүдийн нэг байсан гэнэ.Хойд Солонгосын цахим халдлага 2018 оноос эрс өссөн бөгөөд энэ нь пуужингийн туршилтууд идэвхжсэн үетэй давхцаж байгаа аж. Цар тахлын улмаас Хойд Солонгосын гадаад худалдааэрс унаж, улмаар алдагдсан орлогоо нөхөхийн тулд цахим халдлагад илүүтэй найдах болсон гэж эх сурвалж өгүүлжээ. 

Өмнөд Солонгосын Засгийн газрын тооцоолсноор, Хойд Солонгос 2022 онд цахим халдлагын тусламжтайгаар 1,7 тэрбум гаруй долларыг крипто валют хэлбэрээр хулгайлсан, хилийн чанадад ажилладаг ажилчдаас олон зуун сая долларын ашиг олсон гэнэ. Мөн Хойд Солонгост цахим валют хулгайлах эсвэл бусад халдлага зохион байгуулах 10 мянган хакер ажилладаг аж.

Түүнчлэн Хойд Солонгосын олон мянган программист Ази, Африкийн орнууд руу хурамч нэрээр явж, апликейшн хөгжүүлэгчээр ажиллахын зэрэгцээ хакер, тагнуулын үйл ажиллагаа гүйцэтгэдэг гэж Өмнөд Солонгосын Засгийн газар мэдэгдэж байв.

Г.Бямасүрэн