Финландад хурд хэтрүүлсэн иргэнд асар өндөр торгууль бичжээ. Энэ улсын иргэн Андерс Виклеф хурд хэтрүүлснийхээ төлөө 121 мянган еврогоор торгуульж, машин жолоодох эрхээ 10 хоногоор хасуулсан гэж The Mirror мэдээлсэн байна. 

Сонинд бичсэнээр, Андерс Виклеф 50 км/цагийн хурдны хязгаартай бүсэд 82 км/цагийн хурдтай явж байсан тул цагдаагийнхан түүнийг зогсоожээ. Тэрбээр цагаа олж тормоз гишгиж амжаагүй тул хурд хэтрүүлсэн хэмээн тайлбарласан байна. 

Түүнд хурд хэтрүүлсний төлөө 121 мянган евро буюу монгол мөнгөөр 460 сая гаруй төгрөгтэй дүйх торгууль оноожээ. Андерс Виклефт ийм өндөр торгууль бичих болсон нь тус улсын журамтай холбоотой. Финландад замын хөдөлгөөний дүрэм зөрчсөн хүмүүсийн орлогын түвшнээс хамаарч торгуулийг тогтоодог юм байна.

Андерс Виклеф нь Финландын хамгийн чинээлэг иргэдийн нэг аж. Тэрбээр барилгын логистик, үл хөдлөх, худалдаа, аялал жуулчлалын салбарт 20 гаруй компани эзэмшдэг, 2020 онд гэхэд л 11 сая еврогийн орлого олж байжээ. Өмнө нь тэрбээр 2013 онд мөн л хурд хэтрүүлсэн зөрчлийнхөө төлөө 95 мянган евро, 2018 онд 63 мянган еврогоор торгуульж байсан гэнэ. 

Г.Бямбасүрэн