Канадад ойн түймэр газар авсан хэвээр, тус улс ойн түймрийг цурманд оруулахаар ажилласаар байгаа бол Канадын түймрийн утаа Хойд Америкийг бүрхэж, улмаар эрсдэлийн өндөр түвшний анхааруулга зарлажээ. Энэ талаар ВВС агентлаг мэдээлсэн байна. 

Эх сурвалжийн мэдээлснээр, Канад даяар 3,3 сая га газар шатжээ. Улмаар орон даяар, галд өртсөн бүс нутгуудаас олон мянган хүнийг нүүлгэн шилжүүлсэн бөгөөд ойн түймрийн утаа Онтарио, Квебекийн томоохон хотуудыг бүрхсэн байна. Утаа бүрхэж, орчны бохирдол огцом нэмэгдсэн тул Квебк мужид багтраа болон амьсгалын замын бусад өвчинтэй хүмүүсийг гэрээсээ гарахгүй байхыг анхааруулжээ. Түймрийн утааны улмаас агаарын чанар хүний эрүүл мэндэд "нэн өндөр эрсдэлтэй" түвшинд хүрсэн гэж Канадын Байгаль орчны яам мэдэгдсэн байна.

Канадын ойн түймрийн үр дагавар АНУ-ын нутагт ч хүрчээ. ВВС агентлагийн мэдээлснээр, түймрийн утаа Нью-Йорк, Коннектикут мужид хүрсэн байна. АНУ-ын Байгаль хамгааллын агентлаг АНУ-ын зүүн хойд нутгийн агаарын чанарыг "эрүүл бус", нэн ялангуяа амьсгалын замын өвчинтэй хүмүүст эрсдэлтэй гэж ангилжээ. Тиймээс иргэдийг гадаа спортоор хичээллэхгүй байх, утаатай бүсээс хол байхыг эрүүл мэндийн байгууллагууд иргэдэд хандан анхааруулсан байна.

Г.Бямбасүрэн