Газын зурвас дахь дүрвэгсдийн хуаранд байшин шатаж, 21 хүн амиа алдсаны дотор долоон хүүхэд байжээ. Энэ талаар орон нутгийн эмнэлгээс авсан эх сурвалжтайгаар Германы DW агентлаг мэдээлсэн байна.
Эх сурвалжийн мэдээлснээр Жабалия дүрвэгсдийн хуаранд байх байрны дээд давхарт гал гарч, улмаар гал цааш тархжээ. Гал түймрийн улмаас байшинд байсан бүх хүн амиа алдсан байна. Байшин дотор өвөлд бэлтгэн их хэмжээний түлш хадгалсан байсан нь гал хурдан тархахад нөлөөлсөн байж болзошгүй гэж үзэж байгаа аж. Галын шалтгааныг тодруулахаар тусгай комисс ажиллаж байгаа гэнэ.
Газын зурвасыг хяналтдаа байлгадаг хэт даврагч исламын ХАМАС хөдөлгөөн эмгэнэл илэрхийлээд, нутгийн оршин суугчдыг оршуулах ажилд оролцохыг уриалсан байна. Мөн Палестиний тэргүүн Махмуд Аббас 11 дүгээр сарын 18-ны өдрийг Гашуудлын өдөр болгон зарлажээ.
Жабалия нь Газын зурвасд байх дүрвэгсдийн найман хуарангийн хамгийн том нь юм. Араб, Израилийн дайны дараа 1949 онд энд 35 мянга орчим палестин хүн орогносон байна. Өдгөө энэ хуаранд 110 мянган дүрвэгч амьдардаг аж.
Г.Бямбасүрэн
Уншиж байна |