Байгаль орчны газар, Экологийн цагдаагийн албатай хамтран цаг үеийн асуудлаар мэдээлэл хийлээ.

НБОГ-ын үнэлгээ, дүгнэлт хариуцсан мэргэжилтэн Ж.Батзолбоо:

-Нөхөн сэргээлтийн шалгалтын хүрээнд 214 аж ахуйн нэгжийн тусгай зөвшөөрөл бүхий талбайгаар орж танилцсан. Одоогийн байдлаар 86 аж ахуйн нэгж ашиглалтын тусгай зөвшөөрөл хүчинтэй байгаа боловч Засаг даргын захирамжаар цуцлагдсан болон өмнө нь тусгай зөвшөөрөл эзэмшиж байсан, тухайн талбай дээр олборлолтын үйл ажиллагаа явуулснаас үүдэн эвдрэлтэй талбай байгаа эсэхийг ажлын хэсэг орж үзнэ.

Нийслэлийн нутаг дэвсгэрт 2014 оноос хойших нөхөн сэргээлтийн тоон мэдээллийг танилцуулахад 2014 онд 173 га талбайд нөхөн сэргээлтийг тусгай зөвшөөрөлтэй аж ахуйн нэгжүүд хийж гүйцэтгэсэн бол 2015 онд 73 аж ахуйн нэгжид, 2016 онд 35, 2017 онд 41, 2018 онд  114га талбайд, 2019 онд 97 га талбайд нөхөн сэргээлтийг аж ахуйн нэгжүүд өөрсдийн хөрөнгөөр хийсэн байна.

Нийслэлийн Засаг даргын захирамжаар голын сав газраас  хайргыг олборлож байсан 46 аж ахуйн нэгжийг цуцалсан. Үлдсэн 86 тусгай зөвшөөрөлд ихэнх нь уулын дайрга дараагаар нь элс, шавар багтаж байгаа. Уулын дайраг гэдэг нь уулын буталсан чулуу юм. Голын хайрга бараг байхгүй болсон гэлээ.  

НМХГ-аас “Нийслэлийн нутаг дэвсгэр дээр ашигт малтмал ашиглах тусгай зөвшөөрөлтэй аж ахуйн нэгжүүдэд НМХГ, НБОГ, Экологийн цагдаагийн албаны хамтарсан нөхөн сэргээх 2020 нэртэй арга хэмжээг нийслэлийн нутаг дэвсгэрт явуулж байна. нийслэл хотод ашигт малтмалын тусгай зөвшөөрөлтэй 86 лиценз, хайгуулын 82 лицензтэй аж ахуйн нэгж байдаг. Үүнийг нэг бүрчлэн тоолж байгаль орчны багц хуулийн дагуу арга хэмжээ аваад энэ ажил явагдаж байна. одоогийн байдлаар Сонгинохайрхан, Хан-Уул, Баянзүрх, Налайх дүүрэгт ажлын гурван хэсэг гаран ажиллаж байна. Есдүгээр сарын 20 хүртэл үйл ажиллагаа явуулах бөгөөд Байгаль экологийн тэнцвэрт байдлыг хадгалах, нөхөн сэргээлтийн мэдэгдлүүдийг аж ахуйн нэгжүүдэд хүргэсэн. Есдүгээр сарын 20-оос хойш арга хэмжээ тооцон ажиллана.

Давхардсан тоогоор 267 аж ахуйн нэгжийг уг шалгалтад хамруулсан. 69 аж ахуйн нэгжид 87,1 сая төгрөгийн торгуулийг оногдуулж ажилласан. Тусгай зөвшөөрөлгүй ажил явуулсан хоёр аж ахуйн нэгжийг эрүүгийн цагдаагийн албад шилжүүлж эрүүгийн тухай хуулийн арга авсан хэмээн мэдээллээ. 

Э.Үүрийнцолмон