Төв аймгийн Баяндэлгэр сумын Байдлаг багийн “Тогосын хоолой” гэдэг газар /сумын төвөөс баруун зүгт 8 км-т, Багануур дүүргээс баруун зүгт 38 км-т/ Улаанбаатар хотоос Дорнод аймгийн чиглэлд шатахуун ачин зорчиж явсан “Би Эм Си Си” ХХК-ийн “Норд бенз” загварын ачааны автомашин онхолджээ.

Ослын дуудлагыг 2020.07.28-ны өдрийн 08:15 цагт Нийслэлийн Багануур дүүргийн Онцгой байдлын хэлтэс, Цагдаагийн хэлтсийн алба хаагчид  хүлээн авч 36 км зам туулан 08:43 цагт очиж 200-300 литер шатахуун асгарсан 12 м2 тайлбайд элс асган саармагжуулсан байна. Мөн онхолдсон автомашиныг татан босгожээ. 

Өнгөрөгч баяр наадмын өдрөөр буюу энэ сарын 15-нд Архангай аймгаас Завхан аймаг явах замд шатахуун ачсан автомашин онхолдож дэлбэрсний улмаас хоёр хүн нас барж, найман хүн түлэгдсэн. Осолд өртсөн дөрвөн хүний бие хүнд байгаа учраас БНСУ-д эмчлүүлэх шаардлагатай болоод байгаа юм.