2019 оны Дэлхийн хөнгөн атлетикийн шилдэг тамирчдын нэр өнгөрөгч амралтын өдрүүдэд тодорлоо.

Оны шилдэг эрэгтэй тамирчнаар Кенийн марафонч Элиуд Кипчоге шалгарсан бол эмэгтэй тамирчдыг АНУ-ын гүйгч Далила Мухаммад өнгөлжээ. 35 настай Кипчоге дөрөвдүгээр сард Лондоны марафонд дөрөвдэх удаагаа түрүүлэхдээ 2 цаг 2 минут 37 секундын амжилт үзүүлж бүх цаг үеийн түүхэнд гуравт бичигджээ.

Улмаар аравдугаар сард Венад “Ineos159 Challenge”-ийн үеэр энэхүү зайг хамгийн түрүүнд 2 цагаас дотогш гүйсэн (1:59:40.2) хүнээр тодорсон билээ. 29 настай Мухаммадын хувьд энэ онд 400 метрийн халхалттай гүйлтийн дэлхийн дээд амжилтыг хоёр удаа шинэчлэн тогтоожээ. Анх долдугаар сард АНУ-ын аварга шалгаруулах тэмцээний үеэр 52.20-оор гүйсэн бол “Доха-2019” ДАШТ-ий финалд 52.16 секунд болгож урагшлуулсан юм.

М.Бүүвэй