Японы мэргэжлийн сoмо бөхийн 69 дэх их аварга Хакүхо М.Даваажаргал Кюүшюү башёгийн 15 дахь өдөр буюу 2019 оны хамгийн сүүлийн барилдаанд залуу озэки Такакейшог итгэл төгс ялж 14 даваа, 1 унаатай 43 дахь түрүүгээ хүртэв. Ийнхүү Японы Эзэн хааны болон Ерөнхий сайдын цомыг 43 удаа хүртсэн анхны их аварга болж сүмогийн түүхэнд тодоор бичигдлээ.

Хосгүй амжилтын эзэн их аваргаас сэтгүүлч уламжлал ёсоор ярилцлага авсан юм. Тэрбээр: “Үнэхээр гайхалтай сайхан байна. Энэ жил бэртэл гэмтэл аваад мэс засалд ороод байхдаа дахиад энд ингээд зогсож чадах болов уу гэж бодогдож байлаа” хэмээн онцолсон юм. Сүүлийн барилдаанд Асанояма Шёодайд унаснаар 4 унаа, 11 даваатай болов.

Харин Шодай 11 даваатай болж дайчин бөхийн кантошёо шагналын эзэн болсон бол Асанояма 2019 онд хамгийн олон буюу 55 даваатай өндөрлүүлсэн бөхөөр тодорсон бөгөөд уран барилдааны гиношёо шагнал хүртлээ. Эдгээр шагналыг дагаж 2 сая иен дагалддаг. Тамаваши Б.Мөнх-Оргил 15 дахь өдрийн барилдаанд өрсөлдөгчөө давж 8 даваатай болж 50 хувийн амжилтаа хийлээ.

Д.Өлзий