Чөлөөт бөхийн эмэгтэйчүүдийн Дэлхийн цомын тэмцээн энэ амралтын өдрүүдэд Японы Нарита хотод боллоо. 18 дахь удаагийн тэмцээнд Япон, Монгол, АНУ, ОХУ, БНХАУ, Украин гэсэн зургаан орны баг өрсөлдснөөс манай тамирчид дөрөвдүгээр байрт оров. Дэлхийн цомын тэмцээнд нэг мөнгө, гурван хүрэл медаль хүртэж байсан Монголын шигшээ баг “В” хэсэгт хойд хөрш ОХУ-ыг 6:4-өөр ялж, АНУ-д 4:6-гаар ялагдаж хэсэгтээ хоёрдугаар байрыг эзлэв. Бүрэлдэхүүнийхээ тэн хагаст цоо шинэ залуусыг багтаасан манай багийн хувьд энэ нь боломжийн үр байлаа. Ялангуяа энэ оны ДАШТ-д багаараа хоёрт орсон ОХУ, гуравт шалгарсан АНУ-ын багтай тулсныг тооцох хэрэгтэй.

Оросын баг ДАШТ-ээс хоёр алт, нэг мөнгө, хоёр хүрэл, АНУ нь гурван алтан медаль хүртсэн. Хүрэл медалийн төлөөх барилдааныг Дэлхийн цомын дөрвөн удаагийн аварга хүчирхэг бүрэлдэхүүнтэй БНХАУ-ын шигшээ багтай хийв. Нанхиадын баг манай багийг 3:7-гоор ялж шагналын тавцанд зогсох эрхтэй болсон юм. Өмнөд хөршийн эсрэг манай бөхчүүдээс ОУХМ Б.Болортуяа, Э.Гантуяа, Ө.Пүрэвсүрэн нар ялалт байгууллаа.

Ялангуяа “Нурсултан-2019” ДАШТ-ий хүрэл медальт Б.Болортуяа “цол дагаж бяр” гэдэгчлэн Наритад гурван барилдаан хийхдээ бүгдэд нь ялалт байгуулав. Бүр Нурсултаны алтан медальт Жакарра Винчестер (АНУ)-ийг цэвэр дарж, ДАШТ-д хамт хүрэл медалийн тавцанд зэрэгцэн зогссон Ольга Хорошавцева (ОХУ) болон Чен Жявэй (БНХАУ) нарыг ялсан.

Залуу мастерийн хувьд өөрийнхөө түвшинг ийнхүү бодитойгоор баталгаажуулаад авлаа. Энэ удаагийн Дэлхийн цомын шигшээ барилдаанд эзэн орны бөхчүүд АНУ-ыг 7:3-аар буулган авснаар 11 дэх түрүүгээ хүртэв. Харин тавдугаар байрт Украиний баг ОХУ-тай 5:5-аар тэнцэхдээ ялалтын чанараар давамгайллаа.

Дэлхийн цомын дүн

1. Япон 2. АНУ 3. БНХАУ 4. Монгол 5. Украин 6. ОХУ

ОХУ – Монгол 4:6

АНУ – Монгол 6:4

БНХАУ – Монгол 7:3

Манай бөхчүүдийн барилдааны амжилт

50 кг: Б.Чимгээ хоёр барилдаж, нэг ялав (50%)

50 кг: Ц.Намуунцэцэг нэг барилдаж, нэг ялагдав (0%)

53 кг: Н.Анударь гурав барилдаж, гурав ялагдав (0%)

55 кг: Б.Болортуяа гурав барилдаж, гурав ялсан (100%)

57 кг: А.Батцэцэг гурав барилдаж, хоёр ялав (67%)

59 кг: Б.Шоовдор гурав барилдаж, нэг ялав (33%)

62 кг: Э.Гантуяа гурав барилдаж, хоёр ялав (67%)

65 кг: Ө.Пүрэвсүрэн гурав барилдаж, нэг ялав (33%)

68 кг: Э.Дэлгэрмаа гурав барилдаж, нэг ялав (33 %)

72 кг: Э.Даваанасан гурав барилдаж, хоёр ялав (67%)

76 кг: Г.Ариунжаргал гурав барилдаж, гурав ялагдав (0%)

Ц.Ганбат