УИХ-ын гишүүн асан Ж.Батзандан өнөөдөр Төрийн ордонд мэдээлэл хийлээ. Тэрбээр "2008 онд жагсаал хийсэн гэж гурван сар шоронд хийсэн бол сая “Хэрээ мэдэхгүй дарвалзсан” гэж хоёр сар 15 хоног хорилоо. Нийгэмд учруулсан хохиролгүй гэж үзээд хэргийг хэрэгсэхгүй болгосон. Би эрх чөлөөтэй боллоо. Гартаа гавтай, хөлөндөө гинжтэй, амаа үдүүлсэн 4 жил өнөөдөр дууслаа. Одоо үгээ хэлнэ, тэмцлээ үргэлжүүлнэ. Эрх баригч намынханд дүгнэлт өгнө. Дөрвөн жилийн өмнө надтай хамт тэмцэж явсан нөхдүүд ямар болсныг дүгнэнэ. 

Би 461 дүгээр ангид хоригдож байгаад ирлээ. Ажилгүйдэл түүхэнд байгаагүй дээд цэгтээ хүрчээ, ядуурал хэрээс хэтэрч, аж ахуйн нэгжүүд дампуурч дуусчээ. Магадгүй Төрийн ордонд байгаа хүмүүс баян цатгалан байхыг үгүйсгэхгүй. Тэр дарга нары мөрийн хөтөлбөр 95 хувьтай биеэлсэн байж магадгүй. Хүмүүсийн халаас мөнгөгүй байна. Эрх баригч намынхны мөрийн хөтөлбөр ийм л байдалд хүргэсэн шүү. 

Тун удахгүй эрх баригчдад дүн тавих бүх ард түмний хуралдайг Төв талбай дээр зарлана. Надтай хамт Д.Мөнх-Эрдэнэ ирэх байх. Одоо бүгдээрээ тэмцэж талбай дээрээ гарч үгээ хэлнэ. Хоригдож байсан хүн бүхэн үгээ хэлнэ. Үгээ хэлсэн болгоныг шоронд хорьдог нөхдүүдэд тохирох дүнг нь тавьцгаая. Ингээд миний бие өнөөдрөөс эхэлж эрх чөлөөтэй боллоо" гэв.