Налайх дүүрэгт буун дуу гарч, хоёр хүн буудуулсан талаар бид мэдээлсэн. Эмнэлэгт хүргэгдсэн хохирогчдын биеийн байдлын талаар Налайх дүүргийн эрүүл мэндийн нэгдлийн дарга Б.Өлзийсайханаас тодрууллаа. -Дүүргийн эмнэлэгт өвчтөнүүд хэзээ хүргэгдэж ирсэн бэ? -Өнөөдөр өглөө 11.30 цагт дүүргийн нэгэн банкинд хоёр хүн буудууллаа гэсэн дуудлага манайд ирсэн. Уг дуудлагын дагуу хэргийн газарт очиж, хохирогчдод анхны тусламж үзүүлэн, Налайх дүүргийн нэгдсэн эмнэлэгт авч ирлээ. -Хохирогчдын биеийн байдал ямар байна вэ? -Одоогоор хэвлийн тус газраа буудуулсан 30 гаруй насны эрэгтэйн биеийн байдал хүнд байна. Бууны сум хэвлийн тус газрыг нэвт гарсан тул цус ихээр алдаж байна. Бид Эрүүл мэндийн яам руу холбогдож яаралтай үед ашигладаг алсын түргэн тусламжийн баг авч ирсэн. Энэ багт нарийн мэргэжлийн дөрвөн хүн ирж, одоо мэс ажиллагаа хийж байна. Хагалгаа хэдэн цаг үргэлжлэх болон хагалгааны дараа ямар үр дүн, хүндрэл гарах эсэх талаар одоогоор хэлэх боломжгүй байна. -Гарандаа буудуулсан хүний хувьд? -Бид эмнэлгийн тусламж үзүүлсэн. Одоогоор энэ хүний хувьд ямар нэг хүндрэл гараагүй байна. Үүнээс өөр мэдээлэл өгөх боломжгүй байна.