Өнгөрөгч долоо хоногт Улсын Ерөнхий прокурор Б.Жаргалсайханы бүрэн эрхийн хугацаа дуусгавар болж, дахин зургаан жил томилох Ерөнхийлөгчийн саналыг УИХ дэмжсэн. Ингээд Ерөнхийлөгч зарлиг гарган Б.Жаргалсайхан нийт 12 жилийн хугацаанд хууль цаазын тэргүүнээр томилогдов.

Харин уг томилгоотой холбоотойгоор хуульч Б.Гүнбилэг өөрийн цахим хуудаснаа Ерөнхийлөгч өөрөө хууль биелүүлэхгүй байгааг дурдаад УЕП-оор 60 нас хүрсэн хүн томилогдох учиртай ч 61 нас хүрсэн хүнийг томилсон нь хууль зөрчсөн үйлдэл гэж тайлбарлав. 

Ингэхдээ Ерөнхийлөгч гэхээсээ илүүтэйгээр түүний хатавч хаяанд буй хүмүүсийн ятгалгаар Б.Жаргалсайханы томилгоо хуулийн хүрээнд явагдана гэж сэнхрүүлсэн байж ч магадгүй гэсэн юм. 

Төрийн өндөр албан тушаалтнууд дээгүүрээ энэ мэтээр хууль зөрчдөг харин энгийн иргэд хууль зөрчөөд торгуулдаг, хорьж цагдуулдаг гээд хуулийг үгүйсгэх  нийгмийн сэтгэхүйг улам дэмжиж буй. Тиймээс Монгол Улсын Ерөнхийлөгч У.Хүрэлсүхийг Үндсэн хуулийн цэцэд өгнө гэдгээ мэдэгдэв.