Нийгмийн даатгалын ерөнхий хуульд нэмэлт, өөрчлөлт оруулах хуулийн хэлэлцүүлэг боллоо. УИХ-д өргөн барихад бэлэн болоод буй Нийгмийн даатгалын ерөнхий хуульд нэмэлт, өөрчлөлт оруулах тухай хуулийн төслийн хэлэлцүүлгийг МҮХАҮТ, УИХ-ын гишүүн, ажлын хэсгийн ахлагч Б.Түвшинтэй хамтран зохион байгууллаа. Хэлэлцүүлэгт аж ахуйн нэгж, бизнес эрхлэгчдийн төлөөлөл оролцсон юм. УИХ-ын гишүүн Б.Түвшин хуулийн төслийн үзэл баримтлалыг танилцуулах үеэрээ, олон талын судалгаа, хэлэлцүүлгийн үндсэн дээр дараах гол өөрчлөлтүүдийг тусгасан болохыг онцлов.

Тухайлбал, ажил гүйцэтгэх гэрээгээр хийсэн нэг удаагийн ажлын хөлснөөс нийгмийн даатгалын шимтгэл (НДШ) авахгүй байх, ажил олгогчийн НДШ төлөх дарамтыг бууруулах замаар ажилтанд олгох цалингийн хэмжээг нэмэгдүүлэх, мөн хоол, унааны зардлаас шимтгэл авах зохицуулалтыг зогсоох зэрэг саналууд хуулийн төсөлд тусгагджээ. Хэлэлцүүлэгт УИХ-ын гишүүн Ч.Лодойсамбуу, Ж.Золжаргал, МҮХАҮТ-ын Ерөнхийлөгч Л.Төр-Од нар оролцож, бизнес эрхлэгчдийн асуултад хариулан санал солилцсон байна. Бизнес эрхлэгчдийн гаргасан саналуудыг нэгтгэн, ажлын хэсэгт хүргүүлэхээр боллоо.