Мьянмарт болсон газар хөдлөлт 3000 гаруй хүний аминд хүрснээр тус улсын дотоодын  зэвсэгт мөргөлдөөн түр зогслоо. Мьянмарын төв хэсэгт өнгөрсөн баасан гарагт тохиосон 7.7 магнитудын хүчтэй газар хөдлөлт нь тус улсад сүүлийн 100 жилд хамгийн олон хүний аминд хүрсэн гамшиг боллоо. Албан ёсны мэдээллээр амиа алдсан хүний тоо 3003-д хүрч, 4515 хүн гэмтэж бэртээд байна.

Мөн 351 хүн сураггүй хэвээр байна. Газар хөдлөлтийн хор уршгийг бууруулах, аврах ажиллагааг эрчимжүүлэх үүднээс цэргийн хунтын засаг захиргаа дөрөвдүгээр сарын 3-наас 22-ны хооронд зэвсэгт мөргөлдөөнийг түр зогсоохоо мэдэгдэв.

Энэ хугацаанд ардчиллыг дэмжигч хүчин болон үндэстний цөөнхөд чиглэсэн байлдааны ажиллагааг зогсоох шийдвэрийг төрийн мэдлийн хэвлэлээр дамжуулан мэдээлжээ. Ардчиллыг дэмжигч Үндэсний эв нэгдлийн засгийн газар ч мөн адил хоёр долоо хоногийн хугацаанд гал зогсоохоор болсноо бямба гарагт зарласан нь хямралт нөхцөлд эв нэгдлийн боломж бий болгох алхам хэмээн ажиглагчид дүгнэж байна.

Цэргийн хунтын тэргүүн Мин Аун Хлайн ирэх пүрэв гарагт Тайландын нийслэл Бангкок хотыг зориж, бүс нутгийн удирдагчдын уулзалтад оролцохоор төлөвлөжээ. Энэхүү айлчлалын хүрээнд тэрбээр олон улсын тусламж хүсэхээр зорьж буй ч 2021 оны төрийн эргэлтээс хойш тусгаарлагдсан Мьянмарт хандсан улс орнуудын байр суурь тодорхойгүй хэвээр байна. Мьянмар улсын хувьд цэргийн дэглэм тогтсоноос хойш олон улсаас тусгаарлагдаад буй. Гэсэн хэдий ч олон улсын хамтын нийгэмлэгээс улам бүр Мьянмарт хүмүүнлэгийн тусламж үзүүлэх тухай мэдэгдсэн бөгөөд Мин Аун Хлайнтай яаралтай зөвшилцөж хамтран ажиллах шаардлагатай байна гэж мэдэгджээ. Цаашид амиа алдсан хүмүүсийн тоо 10 мянгад хүрч магадгүй гэж АНУ-ын геологийн албанаас мэдээлжээ.