УИХ-ын хаврын чуулганаар хууль, хяналтын байгууллагын удирдлагуудын томилгоо шил даран хийгдэнэ. Өчигдөрхөн /2025.04.03/ АТГ-ын дарга З.Дашдавааг зургаан жилээр улираан томилсон бол араас нь УЕП- Б. Жаргалсайханыг ч улираах эсэх яригдаж буй. Томоохон томилгоонуудтай мөр зэрэгцэн ҮХЦ-ийн даргын томилгоо ч яригдаж эхэллээ.

Ирэх сард ҮХЦ-ийн дарга, гишүүн Г.Баясгалангийн бүрэн эрхийн хугацаа дуусгавар болно.

Г.Баясгаланг УИХ-ын санал болгосноор 2019 онд томилсон түүхтэй. Хуулиараа ҮХЦ-ийн гишүүнийг зургаан жилийн хугацаатай томилдог.

У.Хүрэлсүх, Д.Амарбаясгалан, Л.Оюун-Эрдэнэ нар АТГ, УЕП, ҮХЦ-ийн удирдлагуудын албан тушаалыг эв найртай хуваагаад авах уу гэдэг анхаарлын төвд буй.

УИХ-ын дарга Д.Амарбаясгалан өөрийн зөвлөх Ц.Мөнх-Оргилыг ҮХЦ-ийн даргаар явуулах сураг хэдийнэ сонстоод эхэлсэн.

ҮХЦ-ийн томилгооны угшил угаас улстөрөөс бүрэн хамааралтай явж ирсэн жишгээ л дагах нь дээрх нүүдлээс ч харагдана. Тиймдээ ч ҮХЦ хууль гишгэлж, улстөрийн томилгоо хийдэг болоод удаж буй.

Ингэж дүгнэх шалтгаан, 2024 оны УИХ-ын сонгуулийн тогтолцоог МАН-ын хүслээр Үндсэн хуульд өөрчлөлт оруулах гишгүүр болж өгсөн нь ҮХЦ. Үндсэндээ ҮХЦ ҮАБЗ-ийн гурван гишүүний дохиур болж хувирсан.