Газрын тосны олборлолт, нийлүүлэлтийн тэнцвэрт байдалд өөрчлөлт оруулах томоохон шийдвэрийг ОПЕК+ бүлгийн гол орнууд зарлалаа. АНУ-ын Ерөнхийлөгч Дональд Трампын захиргаанаас үзүүлж буй дарамт шахалт улам нэмэгдэж байгаа учир Саудын Араб тэргүүтэй найман улс тавдугаар сараас эхлэн газрын тосны олборлолтоо огцом нэмэгдүүлэх шийдвэр гаргаад байна.

Тодруулбал, ОПЕК+–ийн гол гишүүд болох Саудын Араб, ОХУ, Арабын Нэгдсэн Эмирт Улс, Кувейт, Ирак зэрэг орнууд ирэх тавдугаар сараас эхлэн олборлолтын хэмжээг өдөрт 411 мянган баррелиар нэмэгдүүлэхээр болжээ.

Энэ нь 2020 оноос хойших хамгийн өндөр нэмэгдэлд тооцогдож байна. Өмнө нь олборлолтыг өдөрт дунджаар 138 мянган баррелиар нэмэгдүүлэхээр төлөвлөж байсан бол шинэ шийдвэрийн дагуу нийт олборлолт өдөрт 2.2 сая баррелиар өсөх болсон нь Норвеги Мексикийн олборлолтын түвшинд хүрэх өндөр үзүүлэлт болж байна.  

Олборлолтын хэмжээг нэмэгдүүлэх шийдвэр нь нөхцөл байдлаас шалтгаалан түр хугацаанд зогсох, цуцлагдах боломжтой. Уян хатан байдлыг хангаж буй уг зохицуулалт нь гишүүн орнуудад өмнө нь бууруулсан хэмжээг нөхөх боломжийг олгоно хэмээн ОПЕК-оос гаргасан мэдэгдэлд дурдсан байна. Дээрх найман улсын дараагийн уулзалтыг тавдугаар сарын 5-нд товлосон бөгөөд уг уулзалтаар зургаадугаар сараас хэрэгжих олборлолтын шинэ квотыг хэлэлцэх юм. Шинэ зохицуулалтын дагуу тавдугаар сард Оросын олборлолтын квот өдөрт 9.083 сая баррель, харин Саудын Арабынх 9.2 сая баррель байх юм. Газрын тосны зах зээлд ойрын саруудад их хэмжээний нийлүүлэлт хийгдэх төлөвтэй байгаа нь үнийн уналтад хүргээд байна. АНУ-ын Ерөнхийлөгч Дональд Трампын засаг захиргаа гадаадаас орж ирж буй бүх бараанд татвар ногдуулах шийдвэр гаргасны дараа газрын тосны үнэ огцом буурсан бөгөөд Лондоны ICE биржийн арилжааны явцад Brent төрлийн газрын тосны фьючерс үнэ 5 гаруй хувиар буурч, нэг баррель нь 70 ам.доллароос доошилжээ.