АНУ-ын Ерөнхийлөгч Дональд Трампын импортын тариф мөрдөгдөж эхэлснээр дэлхийн хөрөнгийн зах зээл хоёр дахь өдрөө унаж байна. Ковид-19 цар тахлаас хойш компаниуд ч хамгийн хүнд үе туулна гэж шинжээчид харж байна.

Дональд Трампын тарифаас хамгийн их хохирлыг “Nike”, “Apple”, “Target” брендүүд амсаж байна. Эдгээр компаниудын хувьцаа  9-өөс дээш хувиар унажээ.

Дональд Трамп Цагаан ордонд хийсэн хэвлэлийн хурлын үеэр сэтгүүлчдэд хандан, "АНУ үйлдвэрлэлээ эх орондоо авчрах зорилгоор импортын татварыг нэмсэн. Үр дүнд нь АНУ-ын эдийн засаг өснө" гэж мэдэгдсэн юм. Одоогийн байдлаар БНХАУ болон Европын холбоо хариу арга хэмжээ авна гэж мэдэгдсэн бөгөөд Францын Ерөнхийлөгч Эммануэль Макрон Европын компаниудыг АНУ-д хийх хөрөнгө оруулалтаа зогсоохыг уриалсан байна. Мөн БНХАУ-ын эрх баригчид ч тус улсад үйл ажиллагаа явуулдаг АНУ-ын компаниудад хийх хөрөнгө оруулалтаа зогсоохыг уриалж байна. Харин Канадын Ерөнхий сайд Марк Карни АНУ-аас импортолсон тээврийн хэрэгсэлд 25 хувийн татвар ногдуулах хариу арга хэмжээ авна гэж мэдэгдэв.

Дональд Трампын импортын тариф нь АНУ-ын сүүлийн жилийн хугацаанд байгаагүй өндөр тариф болжээ. 

Энэ онд дэлхий даяар худалдааны эргэлт хэмжээ 1%-иар буурч магадгүй гэж Дэлхийн худалдааны байгууллагын тооцоолжээ. Мөн АНУ-ын импортын тариф дэлхий даяар инфляцийг хөөрөгдөж, эдийн засгийн өсөлтийг сааруулах төлөвтэй байна.

Баасан гарагийн арилжаагаар Японы жишиг Nikkei 225 индекс 1.8%-иар, БНСУ-ын Kospi индекс 1%-иар, Австралийн ASX 200 индекс 1.4%-иар буурсан байна.

Пүрэв гарагт Америкийн топ 500 компанийг хянадаг S&P 500 индекс 4.8%-иар унаж, ойролцоогоор 2 тэрбум долларын алдагдал хүлээжээ.

Их Британийн FTSE 100 хувьцааны индекс 1.5%-иар буурч, Европ, Япон, Хонгконгийн зах зээлүүд ч унаж байна.