АНУ-ын Ерөнхийлөгч Дональд Трампын импортын тариф мөрдөгдөж эхэлснээр дэлхийн худалдааны чиг хандлага өөрчлөгдөж, хөрөнгийн зах зээл бужигнасаар байна. АНУ худалдааны тэнцвэрээ хадагалах зорилгоор дэлхийн бүх улсад 10-аас дээш хувийн татвар ногдуулсан нь Азийн улсуудад тэр дундаа үйлдвэрлэл хөгжсөн БНХАУ, БНСУ, Вьетнам зэрэг улсуудад хүнд цохилт болж байна. АНУ БНХАУ-тай худалдааны дайн өдүүлсэн 2018 оноос хойш 34 хувийн тариф ногдуулж байсан бол татварын шинэ хуулиар 54 хувьд хүргээд байна.  Мөн Вьетнамд 46 хувь, БНСУ-д 25 хувь болгож тус тус нэмэгдүүллээ. Тэгвэл бүх улсуудад мөрдөгдөх суурь 10 хувийн тариф 4-р сарын 5-аасс хэрэгжиж эхлэхээр болов. АНУ-ын дэд Ерөнхийлөгч Ж.Д.Вэнс тарифын асуудлаар мэдээлэл хийхдээ, “Хөрөнгийн зах зээлийн хариу үйлдэл хүлээгдэж байснаас сайн байлаа”. Мэдээж онцгой шилжилтийн үе учраас хөрөнгийн зах зээл дэх хөдөлгөөнийг бид тооцоолж байсан гэж онцолжээ.

Энэ сарын 3-ны байдлаар АНУ-ын хөрөнгийн зах зээлд 2020 оноос хойш байгаагүй муу үзүүлэлтүүд ажиглагдав. Тухайлбал тус улсын хөрөнгийн зах зээлийн гурван гол индекс болох NASDAQ индекс 5.97%,  S&P500 4.84%,  DJIA 3.98%-иар уналаа.

Тэгвэл хамгийн өндөр татварууд ногдож буй Азийн улсуудын хөрөнгийн зах зээл уналттай байна. Тэр тусмаа Ази тивд хамгийн томд орох Токиогийн хөрөнгийн биржийн арилжаа уналттай эхлэв. Японы тэргүүлэгч 225 компанийн хувьцааны ханшийн хэлбэлзлийг харуулдаг "Nikkei" индекс арилжаа эхлэх үед 4.4 хувиар буурч, 34 138 пункт болсон байна. Хамгийн сүүлд "Nikkei" индекс 2024 оны наймдугаар сард 35 000 пунктээс доошилж байсан бөгөөд тухайн үед АНУ-д хямрал үүсэх вий гэсэн болгоомжлолоос үүдэн дэлхийн зах зээл уналтад орж байсан юм.