Израилын Батлан ​​хамгаалахын сайд Израил Кац Газын зурваст өргөтгөсөн “цэргийн ажиллагаа” явуулахаа мэдэгдээд байгаа. Уг цэргийн ажиллагааны зорилго нь Газын зурвасын томоохон газар нутгийг "Израилын аюулгүйн бүсэд оруулах” зорилготой. Мөн террористууд болон терроризмын дэд бүтцийг устгах цэвэрлэгээ хийнэ гэжээ. Цэргийн өргөтгөсөн үйл ажиллагаа эхлэх тул Израилын арми Газын зурвас дахь Рафах бүсийн оршин суугчдыг гэрээ орхин нүүхийг шаардаад байна.

Генерал Эйял Замираар удирдуулсан Израилын арми Газын зурваст өргөтгөсөн цэргийн ажиллагааг энэ долоо хоногт эхлүүлнэ гэлээ. Израилын Ерөнхий сайд Биньямин Нетаньяху ХАМАС бүлэглэл гал зогсоох хэлэлцээрийн хугацааг сунгах, барьцаанд буй хүмүүсийг суллахаас татгалзсан тул довтолгооныг өргөжүүлнэ гэж мэдэгдсэн юм. Газын зурваст хийх довтолгоогоо өргөжүүлж буй Беньямин Нетаньяху барьцаалагдсан Израилчуудад цаазаар авах ял оноож байгаагаас ялгаагүй гэж Палестины хөдөлгөөний Улс төрийн товчооны гишүүн Иззат аль-Ришк мэдэгдээд байна.