Монгол Улсын төрийн үйл ажиллагаанд Олон улсын үнэлгээний цогц систем (DME) нэвтрүүлэх бэлтгэл ажлын хүрээнд төрийн албан хаагчдыг чадавхжуулах сургалт зохион байгуулагдлаа

Монгол Улсын төрийн үйл ажиллагаанд Олон улсын үнэлгээний цогц систем (DME) нэвтрүүлэх бэлтгэл ажлын хүрээнд Монгол Улсын Ерөнхий сайдын санаачилгаар, Засгийн газрын Хяналт хэрэгжүүлэх газрын дарга Ч.Өнөрбаяр болон Удирдлагын академийн захирал, доктор, дэд профессор Д.Сүрэнчимэг нар хамтран баталсан “Төлөвлөлт, хяналт-шинжилгээ, үнэлгээ” богино хугацааны цогц сургалт зохион байгуулах нарийвчилсан төлөвлөгөө баталсан билээ.

Энэхүү төлөвлөгөөний дагуу 2025 оны 3 дугаар сарын 23-29 өдрүүдэд Засгийн газрын Хяналт хэрэгжүүлэх газрын Үнэлгээ, мониторингийн газрын дарга Д.Үүрийнтуяа ахалсан Ерөнхий Сайдын Ажлын алба, Засгийн газрын Хэрэг эрхлэх газар, Засгийн газрын Хяналт хэрэгжүүлэх газар, Эдийн засаг, хөгжлийн яам, Сангийн яам зэрэг яамд, Авлигатай тэмцэх газар, Шүүхийн шийдвэр гүйцэтгэх ерөнхий газар, Удирдлагын академи, Хэнтий, Дархан аймгийн Засаг даргын Тамгын газрын бодлого төлөвлөлт, төсөвлөлт, тайлагнал, мониторинг, үнэлгээ хариуцсан нийт 20 албан хаагч БНСУ-д “Гүйцэтгэлийн удирдлага” сургалтад хамрагдлаа.

БНСУ-ын Хүний нөөцийн хөгжлийн институтээс зохион байгуулсан туршлага судлах сургалтанд Солонгосын төрийн албаны тогтолцоо, идэвхтэй захиргаа ба түүний үнэлгээ, төрийн үйл ажиллагааны үнэлгээний тогтолцоо, үнэлгээ, гүйцэтгэлийн шалгуур үзүүлэлт, захиргааны төв байгууллагын гүйцэтгэлийн удирдлага ба өөрийн үнэлгээний тогтолцоо сэдвүүдээр сургалт явагдаж, захиргааны шилдэг туршлага бүхий Солонгосын далайн эргийн цагдаагийн ерөнхий газар, Гүйцэтгэлийн үнэлгээний шилдэг яам болох Хөдөө аж ахуй, хүнс, хөдөөгийн яамдад амжилттай хэрэгжүүлсэн төрийн үр дүнтэй бодлого болох Сөүл хотын замын хөдөлгөөний мэдээллийн төв, орон нутгийн шилдэг засаг захиргааны байгууллага, Сэжон хотын захиргаанд зочлн сайн туршлагуудаас суралцлаа.

Энэхүү сургалтыг хааж, Засгийн газрын Хяналт хэрэгжүүлэх газрын Үнэлгээ, мониторингийн газрын дарга Д.Үүрийнтуяа төлөвлөлт, төсөвлөлт, тайлагнал, мониторинг, үнэлгээний хоорондын уялдааг хангах, олон улсын үнэлгээний цогц систем (DME)-ийг Монгол Улсад нэвтрүүлэх бэлтгэл ажлын хүрээнд БНСУ-ын Үнэлгээний туршлагаас суралцах нь цаг үеэ олсон, ач холбогдолтой алхам боллоо. Монгол улс цаашид БНСУ-ын Үнэлгээний хуулийг судлан Үнэлгээний хуультай болох нь чухал юм байна гэж онцлон хэллээ. Мөн сургалтыг маш зохион байгуулсан БНСУ-ын Хүний нөөцийн хөгжлийн институтэд талархал илэрхийлж цаашид төрийн албан хаагчдыг чадавхжуулах сургалтыг хамтран зохион байгуулах хүсэлтээ илэрхийллээ.

Мөн сургалт зохион байгуулсан БНСУ-ын Хүний нөөцийн хөгжлийн институтийн Глобал боловсролын газрын захирал Jeon Hye-ran энэхүү сургалтад хамрагдсан хорин төрийн албан хаагчдад хандан, Та бүхэн хөтөлбөрийн дагуу сургалтыг амжилттай дүүргэсэн явдлыг өндрөөр үнэлж байгаагаа илэрхийлж, сургалтын явцад минутын ч хоцрогдолгүй, хичээлийн сэдэв бие даалт, танилцуулгуудад бүх оролцогчид идэьх зүтгэлтэй оролцлоо. Өмнө сурч байсан багуудаас хамгийн шилдэг баг байлаа хэмээн онцлоод, хамтран ажилласанд талархаж буйгаа илэрхийллээ.

Энэхүү сургалт нь Монгол Улсын төрийн үйл ажиллагаанд Гүйцэтгэлийн удирдлагын шинэчлэл хийх, олон улсын туршлагыг нэвтрүүлэх, төрийн үйл ажиллагааны үр дүнг сайжруулахад чухал ач холбогдолтой алхам боллоо.

#засгийн_газрын_хяналт_хэрэгжүүлэх_газар