ОХУ хаврын цэрэг татлагаа эхлүүллээ. 2025 оны хаврын цэрэг татлагаар 18-30 насны 160,000 ОХУ-ын иргэдийг цэрэгт татах болсон нь 2011 оноос хойших хамгийн өндөр үзүүлэлт юм. Өнгөрсөн 2024 онд 150,000 хүнийг цэргийн албанд татсан.

ОХУ-ын Ерөнхийлөгч Владимир Путин армийн болон цэргийн алба хаагчдын тоог 2.39 саяд, жинхэнэ албан хаагчдын тоог 1.5 саяд хүргэх ёстой гэж мэдэгдсэн. Үүнтэй холбоотойгоор ОХУ ойрын 3 жилд жилд дунджаар 180,000 хүнийг цэрэгт татах төлөвтэй байна. Жилд хоёр удаагийн цэрэг татлагаас гадна ОХУ гэрээт цэрэг элсүүлэх, Хойд Солонгосоос цэрэг элсүүлэх зэргээр хүчээ нэмэгдүүлж байна.

ОХУ-ын Батлан хамгаалах яам 2023 оны 12-р сард цэргийн хүчний тоог нэмэгдүүлэх болсон шалтгаанаа Украины дайн болон НАТО-гийн үргэлжилсэн өргөжилтөөс үүдэлтэй "өсөн нэмэгдэж буй аюул занал"-тай холбон тайлбарласан.

ОХУ-ын Украины эсрэг түрэмгийлсний дараа НАТО Финлянд, Шведийг бүрэлдэхүүндээ багтаасан юм.

Финлянд улс нь ОХУ-тай хамгийн урт буюу 1343 км газраар хиллэдэг бөгөөд тус улсын Ерөнхий сайд Петтери Орпо мягмар гарагт ОХУ-тай хиллэдэг бусад улсуудтай нэгдэж, явган цэргийн эсрэг мина ашиглахыг хориглосон Оттавагийн конвенцоос гарах болсноо мэдэгдсэн. Польш болон Балтийн орнууд ОХУ-аас цэргийн аюул заналхийлж болзошгүй хэмээн үзэж байгаа тул хоёр долоо хоногийн өмнө ийм шийдвэр гаргасан байна.