ОХУ-ын Ерөнхийлөгч Владимир Путины зөвлөх Кирилл Дмитриев энэ долоо хоногт АНУ-д айлчилж Дональд Трампын тусгай төлөөлөгч Стив Виткоффтай уулзахаар болов. Хоёр талын төлөөлөгчид Орос-Украины дайныг зогсоох асуудлыг хэлэлцэх төлөвтэй байна.

2022 онд дайн эхэлснээс хойш ОХУ-ын төлөөлөгчид АНУ-д айлчлаагүй. Тиймээс ОХУ-ын төлөөлөгч АНУ-д айлчлал хийхээр яригдаж байгаа нь хоёр орны харилцаа илт дулаарч байгаа хэлбэр гэж шинжээчид харж байна. Кирилл Дмитриев бол Владимир Путины зөвлөх, ОХУ-ын баялгийн сангийн гүйцэтгэх захирал.  Тэрээр 2022 онд Орос Украинд түрэмгийлэхэд бусад ОХУ-ын төрийн өндөр албан тушаалтнуудын хамтаар АНУ-ын хоригт орсон байдаг. Одоо АНУ-ын Төрийн Департмент Кирилл Дмитриевийн хоригийг цуцалсны дараа виз олгоно гэж CNN онцолжээ.

Даваа гарагт АНУ-ын Ерөнхийлөгч Дональд Трамп ОХУ-ын Ерөнхийлөгч Владимир Путинд уурлаж, эгдүүцсэн тухай мэдээлэл олон улсын анхаарлыг татсан. Дональд Трампын хувьд Орос-Украины гал зогсооход шаардлагатай бүх ажлыг эрчимжүүлж байгаа ч талууд “ахиц дэвшил” гаргахгүй “зогсонги” байгаад бухимдаж байгаагаа илэрхийлсэн юм. Мөн тодорхойгүй байдалд ОХУ-ыг буруутгаж тус улсаас гарч буй газрын тосонд хоёрдогч татвар ногдуулна гэж сүрдүүлээд байгаа. Тэгвэл АНУ-ын Ерөнхийлөгч Дональд Трампын татвараар сүрдүүлсэн мэдэгдэлд ОХУ-ын Ерөнхийлөгч В.Путин хариу өгч "Орос-Украины дайныг дуусгах, энх тайван тогтоох асуудлаар яриа хэлэлцээ үргэлжлүүлэхэд бэлэн байна” гэж мэдэгджээ. Тиймээс талууд асуудлыг эвээр зохицуулж Орос-Украины асуудлаар дахин хэлэлцэхээр болоод байна.