Ховд аймгийн Мянгад сумын нутаг дэвсгэрт байрлах Халзан бүрэгтэй ууланд газрын хорвор элементүүдийн ордыг ил аргаар ашиглах төсөл хэрэгжиж буй. Гэсэн ч өнгөрөгч оны намар нутгийн иргэдийн эсэргүүцэлтэй тулгарсаны улмаас Ховд аймгийн засаг дарга М.Амарсанаа Халзан бүрэгтэйн төслийн хайгуулын үйл ажиллагааг зогсоох захирамж гаргасан байдаг. Харин шүүхээс аймгийн засаг даргын захирамжийг хүчингүй болгож, “Монголиан нэйшнл рийр ийрт корп” компанийг үйл ажиллагаагаа хэвийн явуулах шийдвэр гаргажээ. Ховд аймгийн засаг дарга М.Амарсанаа иргэдийн үймээн, самууныг дэвэргэхгүйн үүднээс ийм шийдвэр гаргасан ч угтаа бол Халзан бүрэгтэй төслийг хэрэгжүүлэх ёстой гэж үзэж буйгаа хэвлэлд өгсөн ярилцлагадаа дурджээ. Нутгийн иргэд ч газрын ховор элементийн талаарх үнэн бодитой мэдээлэл авч уг төслийг үргэлжүүлэх ёстой юм байна гэсэн байр суурьтай болж эхэлсэн байна.

Дэлхийн их гүрнүүдийн удирдагчид газрын ховор элементийн төлөө хэрхэн тэмцэлдэж байгааг бид харж буй. АНУ-ын Ерөнхийлөгч Дональд Трамп ОХУ-ын Ерөнхийлөгч Владимир Путин нар Орос-Украины дайныг “Энхийн хэлэлцээр” байгуулан зогсоох дээр санал нэгдэж буйн цаад шалтгаан бол газрын ховор элемент.   АНУ Украинд зээлүүлсэн 350 тэрбум ам.долларынхоо өрөнд газрын ховор элементээ нийлүүл гэсэн шахалт үзүүлж байна.

Их гүрнүүдийн эмзэг цэг, сөргөлдөөний шалтгаан болж байгаа “газрын ховор” элемент Монголд бий. Ирээдүйд, дэлхийн технологийн хөгжлийг тодорхойлох газрын ховор элементтэй улсууд энэ нөөцөө “стратегийн нөөц” хэмээн хамгаалж байна. “Стратегийн нөөц” хэмээн хамгаалж байгаа гэдэг нь “хав дарж”, “ухаж олборлохгүй” хадгална гэсэн үг биш. Ирээдүйн үнэ цэнийг нь бид өөрсдөө ч төсөөлж үл барам газрын ховор элементийг Монгол улс ч ашиглах ёстой. Улс орон бүр өөрийн бодлого, стратеги, өөрийн туршлагаар энэ нөөцөө тогтоохоор уралдаж буй энэ цаг үед Монголын засгийн газар ч дэмжиж буйг АҮЭБ-ийн сайд Ц.Туваан хэдэнтээ мэдэгдсэн.

Газрын ховор элемент нь компьютер, гар утас, зай хураагуур, соронз, цахилгаан машин, сэргээгдэх эрчим хүч, батлан хамгаалах салбарт хамгийн чухал үүрэгтэй.

Халзанбүрэгтэй төслийг чөдөрлөх нь Монгол Улс дэлхийн хөгжлөөс хэдэн арван жилээр ухарч буй үйлдэл.

Тогтоогдсон нөөцөөрөө дэлхийд өрсөлдөхүйц ирээдүйтэй төсөл гэгдэх Халзан бүрэгтэй орд эдийн засгийн хувьд үр ашигтай.