“Үндэсний эвсэл”-ийн тэргүүн Н.Номтойбаяр Улсын дээд шүүхэд хандлаа. Тэрбээр “УИХ-ын сонгуулийн тухай хуулийн дагуу бичиг баримтаа бүрдүүлэх явцад ЦЕГ-ын Дүн шинжилгээ, мэдээллийн албанаас намайг авлигын хэргээр ял авсан гэх ойлголт өгөхөөр албан бичгийг СЕХ-нд хүргүүлсэн. Ингэснээр СЕХ намайг нэр дэвшигчээс хасах шийдвэр гаргасан.

Би авлигын хэргээр ял авч байгаагүй. Тиймээс Дээд шүүхэд хүсэлт гаргалаа. Би Дээд шүүхээс авлигын хэргээр ял авсан уу, үгүй юу гэдгийг тодруулахаар Дээд шүүхэд хандаж байна.

СЕХ “Үндэсний эвсэл”-ээс нэр дэвшсэн гурван хүнийг бүртгэхээс түр татгалзаад байгаа. Өмнө нь МАН-ын гишүүн байсан хүмүүс. Улс төрийн намын тухай хуулиар аливаа намын гишүүн намаасаа гарах хүсэлтээ бичгээр өгснөөр эрхзүйн харилцаа зогсдог. Гэтэл МАН-ын Хяналтын хорооноос 2024.05.28-ны өдрийн 06 дугаар тогтоолоор СЕХ-нд албан бичиг хүргүүлсэн байна.

Жагсаалтын VI-д байгаа Хулан, Чингэлтэй, Сүхбаатар дүүрэгт нэр дэвшигч Ганболд, Баярхүү нар нь өнөөдрийг хүртэл МАН-ын гишүүн хэвээр гэсэн тодорхойлолтыг өгсөн байна. Хулан, Ганболд, Баярхүү нар хуулийн хугацаанаас өмнө МАН-аас гарах өргөдлөө өгсөн, түүнийг нь хүлээж авсан нотлох баримтууд бий. Гэтэл СЕХ зөвхөн МАН-ын бичсэн матаас бичигт үндэслэн манай нэр дэвшигчдийг хасаж байна. Эцсийн дүндээ Монгол Улсын хууль тогтоомж хүчтэй юу, МАН-ын дүрэм хүчтэй юу.

ЦЕГ-ын төөрөгдүүлсэн бичиг, МАН-ын Хяналтын хорооны хуулиас давсан бичгийг СЕХ хүлээж авч байгааг ЦЕГ, СЕХ, МАН-ын оролцоотой, төрийн эрхийг хууль бусаар авах оролдлого гэж үзэхээр байна. Зохион байгуулалттайгаар өрсөлдөгчдөө хууль зөрчин урьдчилан хасуулж байгаа нь МАН өрсөлдөгчгүйгээр сонгуульд оролцох оролдлогыг хийж байна" гэсэн байр суурийг илэрхийлэв.

Мөн тэрбээр хуулийн байгууллагад итгэл алдарсан ч Дээд шүүхийг МАН-ынх уу эсвэл хууль дээдэлсэн байгууллага уу гэдгийг одоо харахаа хэлэв.