Чөлөөт дэлхийн аварга шалгаруулах тэмцээний хүрэл медальт, Азийн наадмын аварга, ОУХМ Т. Тулга Монгол Улсын гавьяат тамирчин цол хүртэхээр болжээ. 

Хөдөөгийн бусад хүүхдийн адил дээл, гутлаа ханзартал барилдаж өссөн түүнийг балчир байхад хүмүүс өхөөрдөн, нэрийг нь асуухад өөрийнхтэй нь төстэй болоод ч тэр үү “Би улсын заан Тулгаа байна” хэмээн хариулдаг байж.

Бөх болох мөрөөдөлдөө хөтлөгдсөн хүү хувиараа бэлтгэл хийж байгаад 2009 онд Сонгинохайрхан дүүргийн АШТ-ээс хүрэл медаль хүртэн, амжилтын салхиа хагалсан юм. Энэ цаг үеэс чөлөөт бөхийн төрлөөр олон уралдаан тэмцээнд оролцож, Монголынхоо нэрийг дэлхийд цуурайтуулж яваа нэгэн билээ.