Польшийн шинэ Засгийн газар сүүлийн жилүүдэд эрх баригч намын талд үйлчилдэг гэж буруутгагдаж байсан Олон нийтийн телевиз, радио, мэдээллийн агентлагийг татан буулгах ажлыг эхлүүлж байгаагаа зарлажээ. Энэ талаар ВВС агентлаг мэдээлсэн байна. 

Польшийн хэвлэлүүдийн мэдээлснээр, олон нийтийн телевиз, радиог үнэн хэрэгтээ татан буулгахгүй, харин эрх баригч намын нөлөөллөөс хэвлэл мэдээллийн хэрэгслийг гаргах шинэ Засгийн газрын ээлжит алхам байж магадгүй гэнэ. Өнгөрсөн долоо хоногоос олон нийтийн телевизийн 24 цагийн дамжуулалтыг зогсоож, тус агентлагийн удирдлагын багийн гурван гишүүнийг ажлаас нь халах тушаалыг Польшийн Соёлын яам гаргаж байв.

Польшийн хэвлэлүүдийн мэдээлснээр, "Эрх ба шударга ёс" нам төрийн эрхэнд гарсны дараа тус улсад Үндэсний медиа зөвлөл байгуулагдаж, энэ зөвлөл төрийн хэвлэл мэдээллийн удирдлагуудыг томилох эрхтэй болсон байна. Улмаар Польшийн Олон нийтийн телевиз, радио, мэдээллийн агентлагт улс төрийн нөлөөлөл орж, эрх баригч намын талд үйлчилж байгаа гэж буруутгах болсон юм.

Ингээд шинэ засгийн газар уг төрийн агентлагийг татан буулгахаар болсон бөгөөд Польшийн Хельсинкийн хүний эрхийн сангийн гишүүд энэ алхмыг дэмжиж, олон нийтийн хэвлэл мэдээллийн хэрэгслийг нэн даруй шинэчлэх ёстой гэж мэдэгджээ.

Г.Бямбасүрэн