Хятадын эрх баригчид сүүлийн жилүүдэд авлигын гэмт хэрэгтэй хийх тэмцлээ эрчимжүүлж, олон албан тушаалтныг хорих, цаазаар авах ял ч оноож байлаа. Энэ удаад төрийн өндөр албан тушаалтан бүх насаараа хоригдох ял сонссон талаар SCMP сонин мэдээлжээ. 

Тодруулбал, Хятадын Коммунист намын Хэнань мужийн хорооны улс төр, хуульзүйн комиссын дарга асан Гань Жункунь 23 сая доллартай дүйхүйц хэмжээний авлига авсан хэрэгт буруутгагдан, 12 дугаар сарын 27-ны өдөр бүх насаараа хоригдох ял сонсжээ. 

Шүүх тогтоосноор, 1999-2021 онуудад Гань төрийн төрөл бүрийн албан тушаал хашиж байхдаа албан тушаалаа урвуулан ашиглаж, төсөл хэрэгжүүлэх, бизнес эрхлэхэд дэмжлэг үзүүлэн, үүнийхээ хариуд авилга авч байсан гэнэ. Гань гэм буруугаа хүлээж, бусад гэмт этгээдүүдийн талаар мэдээлэл өгснийг харгалзан үзэж ялыг хөнгөрүүлэн, бүх насаар нь хорих ял оноосон гэж шүүх мэдэгджээ. 

Г.Бямбасүрэн