Японы парламентын доод танхимын гишүүн Мито Какизаваг Токиогийн Прокурорын газар баривчилжээ. Энэ талаарх мэдээллийг NHK суваг дамжуулсан байна. 

Эх сурвалжийн мэдээлснээр, Токио хотын нэгэн дүүрэгт сонгуулийн үеэр авлига өгсөн хэрэгт түүнийг сэжиглэн баривчилжээ. Какизава орон нутгийн сонгуулийн үеэр дэмжлэг авахын тулд Кото дүүргийн хууль тогтоох хурлын гишүүдэд туслахуудаараа дамжуулан нийт 200 мянган иений авлига өгсөн гэж мөрдөн байцаагчид үзсэн байна. Харин Какизава авлига өгсөн гэм буруугаа хүлээгээгүй аж. 

Какизава гэм буруутай нь тогтоогдвол түүнд 500 мянга хүртэлх иений торгууль эсвэл гурав хүртэлх жилийн хорих ял оноох юм байна. Түүнийг баривчилсны дараа нотлох баримтын олохын тулд ажлын байранд нь нэгжлэг хийсэн гэж NHK мэдээлжээ.

Г.Бямбасүрэн