Орчин цагт харуул хамгаалалтын систем сайтар хөгжиж, хорих газраас хоригдол оргоход тун хүнд болсон ч олон орны шоронгуудад харуулын нохой ашигласаар байдаг. Харин Бразилд ийм үүрэгтэй нохойны оронд шувуу ашиглаж эхэлжээ. 

МИР24 сувгийн мэдээлснээр, Бразилын Санта-Кантарина мужийн хорих газар нохойны оронд галуу авах болсон бөгөөд энэ шувуу нохойноос дутахааргүй сэрэмжтэй, мөн тэднийг хооллож тэжээхэд зардал нь хямд гэсэн шалтгаанаар ийм сонголт хийсэн байна. 

Санта-Кантарина мужийн хорих газрын төлөөлөгчдийн өгүүлснээр, галуу маш сонор, гадны ямар нэг чимээ гармагц харгалзагч нарт сэрэмжлүүлэн, чангаар дугардаг гэнэ. Ийм чухал үүрэгтэй болсон харгалзагч галууны сүрэн шоронгийн дотор хашаа болон гадна хананы хоорондын бүсэд эргүүл хийдэг аж. 

Бразилд өмнө нь ч мөн энэ аргыг ашиглаж байв. Тодруулбал, 2011 онд Сан-Паулугийн шоронд анх эргүүл галуутай болж байжээ. Түүнчлэн Хятадын хилчид ч галууг ашигладаг бөгөөд галуу нохойноос илүү сонор байж, хууль бус цагаачдыг олоход хилчдэд тусладаг гэнэ. 

Г.Бямбасүрэн