Нийслэл Улаанбаатар хот үүсэн байгуулагдсаны 384 жилийн ойн өдөр өчигдөр тохиолоо. Хотын шинэхэн мэр Х.Нямбаатар энэ өдрийг баяр ёслолын байдлаар тэмдэглэж, гоё үгтэй мэндчилгээ илгээхийг хүссэнгүй. Харин тэрбээр тулгамдсан асуудлыг шийдвэрлэх “давс мэт шорвог” хэмээн тодотгосон гарц гаргалгааг танилцуулжээ.

Түгжрэлийг шийдэхийн тулд:

-Хязгааргүй орж ирж байгаа импортын автомашиныг хязгаарлахын тулд шинээр улсын дугаар олголтод хуулиар хязгаар тавина.

-Нийтийн тээврийн хүртээмжийг нэмэгдүүлнэ. Орчин үеийн евро стандартын шаардлага хангасан 700 орчим автобусаар нийтийн тээвэрт парк шинэчлэлт хийнэ.

-Гэр хорооллын алслагдсан дэнжүүдийг автозамаар холбож, тухайн хэсгүүдэд богино эргэлтийн, дунд оврын автобусаар үйлчилнэ.

-Бага тойруу, Энхтайваны өргөн чөлөө, Чингисийн өргөн чөлөө зэрэг гол замуудын нэгдүгээр эгнээг бүрэн чөлөөлөх тээвэр зохицуулалт болон автозамын шинэчлэлтийн ажлыг 2024 онд эхэлнэ.  

-Автозамын 12 тойрог замын холбоосыг хийж, автозамын сүлжээг бий болгох төлөвлөлтийг хийж байна. Үүний төсвийг нийслэлийн 2024 оны төсөвт тавина.

-Иргэн таниас машиныхаа торгууль, зогсоолын төлбөрийг төлөх, үзлэг оношлогоонд орох зэрэг хуулиар хүлээсэн үүргээ биелүүлэхийг шаардах болно.

-Баруун дөрвөн замаас Зүүн дөрвөн зам, 32-ын тойргоос Энхтайваны гүүр хүртэлх бүсийг төлбөртэй болгоно. Хотын төвөөс 800 м-ын зайд төлбөргүй зогсоолуудыг байгуулахаар бэлтгэл ажлаа хангаж байна.

-Улаанбаатар хотод 2024 онд гурван шугамтай метроны төсөл хэрэгжүүлэх том зорилтыг дэвшүүлж байна. Нийслэлийн өмчид байгаа уул уурхайг метро, тойрог хурдны зам зэрэг томоохон бүтээн  байгуулалтад ашиглахаар УИХ, Засгийн газрын тогтоол боловсруулж  байна.

Улаанбаатар  хотын автозамын түгжрэлийг бууруулах, гэр хорооллыг барилгажуулах тухай анхдагч хуулийн төслийг УИХ-д өргөн бариад байна. Уг хуулийн төслийг УИХ энэ долоо хоногоос хэлэлцэнэ. 

Гэр хорооллыг барилгажуулах чиглэлээр:

Азийн хөгжлийн банктай хамтран гэр хорооллыг орон сууцжуулах зургаан дэд төвийн дэд бүтцийн ажил хийгдэж байна. Үүнээс Баянхошуу, Сэлбэ дэд төвийн ажил бүрэн дууссан. Толгойт, Дэнжийн мянга, Шар хад, Дамбадаржаа гэсэн дөрвөн дэд төвийн дэд бүтцийн ажил хийгдэж байна.

Сэлбэ дэд төвд 12 000, Баянхошуу дэд төвд 6000 гаруй айлын орон сууц барина.

Сэлбэ дэд төвийн 158 га байршилд 2000 нэг талбар айлын газрыг чөлөөлнө. Чөлөөлсөн 2000 айлын газарт 12 000 айлын нам давхрын дундаа ногоон байгууламж, цэцэрлэгт хүрээлэн бүхий хороолол байгуулах зураг төсөл, санхүүжилт шийдэгдээд байна. Газар чөлөөлсөн 2000 айлыг орон сууцанд оруулж, үлдсэн 10 000 айлын орон сууцанд Хайлааст, Чингэлтэй, таван буудал, Дарь-Эхийн гол дагасан айлуудыг оруулах боломж нөхцөл бүрдэнэ. Мөн энэ дэд төвд СУИС, төрийн байгууллагууд, эрүүл мэндийн томоохон байгууллагуудыг цогцоор нь төлөвлөнө. Энэ ажил ирэх хавар эхэлнэ.

Дэд төвүүдийг байгуулснаар агаарын бохирдол 22 хувиар, замын түгжрэл 36.3 хувиар буурна.

Б.Хэрлэн