Хүүхэд хамгаалал, эрсдэлийг бууруулах арга хэмжээг орон даяар эхлүүлж байгаа талаар Боловсролын Ерөнхий газар болон Гэр бүл хүүхэд, залуучуудын хөгжлийн газрын удирдлагууд мэдээлэл өглөө. 

 ГБХЗХГ-ийн орлогч дарга Н.Өлзийхутаг

Сүүлийн гурван жилийн хугацаанд ахуйн чанартай осол гэмтэл авсан хүүхдийн тоо 157 мянгад хүрсэн байна. Үүнээс 330 хүүхэд ахуйн осол гэмтлээс болж нас барсан байна. 

Мөн зөвхөн 2022 он гэхэд 0-17 насны 61016 хүүхэд осол гэмтэлд өртөж, эрүүл мэндийн тусламж үйлчилгээ авсан. Эдгээр хүүхдүүдийн дийлэнх нь тархины хүнд гэмтэл авсан гэсэн тоон мэдээлэл байгаа юм. 

Иймд манай байгууллага Боловсролын Ерөнхий газартай хамтран нэг сарын хугацаанд нөлөөллийн арга хэмжээг зохион байгуулах гэж байна. 

Арга хэмжээний хүрээнд эцэг эхчүүд гэрийн гадна болон доторх эрсдэлийг бууруулах хүчин зүйлсийг нь тодорхойлж зөрчлийг нь арилгуулна. Мөн хичээл сургуулийн ойр орчим дох аюулгүй байдлыг боловсролын байгууллага хариуцна. 

2023 оны эхний найман сарын байдлаар хүүхдийн тусламжийн 108 утас руу 9800 гаруй дуудлага ирсэн байна. Үүний дийлэнх нь гэр бүлийн орчноос үлдсэн нь сургуулийн орчмоос ирсэн дуудлага байсан. Сургуулийн орчноос ирсэн дуудлагыг аваад үзвэл, дийлэнх хувь нь үе тэнгийн дээрэлхэлттэй холбооттой дуудлага мэдээлэл байгаа юм. 

Хүүхдийн төлөвшилд голлон нөлөөлж буй зүйлсийн нэгдүгээрт гэр бүл, хоёрдугаарт сургууль, багш, нөхөд зэрэг гол хүчин зүйлс нөлөөлж байна.  

Иймд бид эдгээр асуудлыг тогтолцоонд авч үзэх ёстой гэж үзэн Хүүхдийг ахуйн осол гэмтэл, болзошгүй эрсдэлд өртөхөөс урьдчилан сэргийлэх, орчны эрсдэлийг бууруулах “Хамтдаа шалгая, хамгаалъя” арга хэмжээг орон даяар эхлүүлж байна.  Тиймээс “Хамтдаа шалгая, хамгаалъя” арга хэмжээг өнөөдрөөс сарын хугацаанд эцэг эх, асран хамгаалагч, аж ахуй нэгж байгууллагуудын оролцоотойгоор орон даяар зохион байгуулж, хүүхдийн эрүүл орчинд амьдрах эрхийг хангахыг зорьж байна.  Арга хэмжээний хүрээнд эцэг, эх, асран хамгаалагч, байгууллага, аж ахуй нэгжүүд дараах байдлаар амьдрах газар, орчиндоо аюулгүй байдлын үнэлгээ хийж, орчны эрсдэлийг бууруулах, арилгах арга хэмжээ авах юм. Тухайлбал,

1. Амьдарч буй орчин, оршин суугаа газрын аюулгүй байдлын үнэлгээ хийхдээ:

- Хашаа, байр, гудамж, орцонд гэрэлтүүлэг байгаа эсэх
- Байрны шат, тагт, цонхны хаалт бүрэн бүтэн эсэх
- Байрны лифтний үйл ажиллагаа, хаалга аюулгүй эсэх
- Нүхэн жорлон, муу усны нүх, ухаж үлдээсэн зоорь байгаа эсэх
- Хүүхдийн тоглоомын талбайн аюулгүй байдал хэвийн эсэх
- Ил задгай гарсан цахилгааны утас байгаа эсэх 
- Байр, хашааны хэсэгт нурж унахаар хашлага хайс, хана байгаа эсэх 
- Гэрийн тэжээвэр амьтад болох муур, нохой зэрэгт хазуулах эрсдэл өндөр хэсэг байгаа эсэх 
- Өндрөөс унаж болзошгүй эд зүйлс байгаа эсэхийг шалгана.

2. Хүүхдийн гэрээс сургууль, цэцэрлэг хүрэх зам, орны аюулгүй байдалд үнэлгээ хийхдээ: 

- Явган хүний гарцын тэмдэг тэмдэглэгээтэй эсэх
- Халтиргаа гулгаатай зам байгаа эсэх
- Явган хүн зорчих хэсэгт ухсан нүх, шуудуу  байгаа эсэх
- Траншейны таггүй нүх, ил задгай дулааны шугам хоолой байгаа эсэх
- Сургуулийн орчны талбай  хайс хашлага бүрэн бүтэн эсэх
- Явган хүний зам дээр авто машин байрлуулсан эсэх
- Ил гарсан цахилгааны  галтай утас байгаа эсэхийг шалгана. 

3. Тухайн орон нутгийн аж ахуй, нэгжүүд өөрт хамаарах гадаад болон дотоод орчинд үнэлгээ хийхдээ: 

- Байгууллагын гадаад болон дотоод орчин гэрэлтүүлэгтэй  эсэх
- Байгууллагын шат, цонхны хаалт бүрэн бүтэн эсэх
- Байгууллагын лифтний үйл ажиллагаа, хаалга аюулгүй эсэх
- Ил задгай гарсан цахилгааны утас, эвдэрсэн залгуур  байгаа эсэх
- Байгууллагын гаднах орчинд эвдэрсэн унаж болзошгүй хайс, хашлага, хана байгаа эсэх
- Траншейны таггүй нүх, ил задгай дулааны шугам хоолой байгаа эсэх
- Явган хүний гарцын тэмдэг тэмдэглэгээтэй эсэх
- Байгууллагын гаднах талбайд халтиргаа гулгаатай хэсэг байгаа эсэх
- Явган хүний зам болон машин тавих хориотой хэсэгт  машин байрлуулдаг эсэх
- Траншейны таггүй нүх, ил задгай дулааны шугам хоолой байгаа эсэх
- Өндрөөс унаж болзошгүй эд зүйлс байгаа эсэхийг шалгана.

Мөн эцэг эх, асран хамгаалагч, иргэд та бүхэн хүүхдийн эрүүл, аюулгүй амьдрах орчин нөхцөлд дээрх зөрчлүүд илэрвэл зураг болон видеогоор баримтжуулж орон нутгийн Гэр бүл, хүүхэд, залуучуудын хөгжлийн газар мэдээлэхээс гадна хүүхдийн аюулгүй орчинд үнэлгээ хийх явцад илэрсэн зөрчлийг засаж сайжруулсан мэдээллийг байгууллагын цахим хуудсандаа нийтэлж, бусад эцэг эх, олон нийтийг уриалаарай" гэв.