40, 50 мянгатын 64 орон сууцанд газар хөдлөлтийн үнэлгээ хийсэн талаар Барилга хот байгуулалтын сайдын сайд Ц.Даваасүрэн мэдээлэл хийлээ.

Тэрбээр “Өнгөрсөн хоёр сарын хугацаанд 40, 50 мянгатын 64 барилгын ашиглалтад үнэлгээ хийхэд маш ноцтой нөхцөл байдлууд илэрлээ. Шалгалтаар нийтийн 54 орон сууцны нэгдүгээр давхрын өргөтгөлийг 321 ААНБ, 10 СӨХ газар эзэмших, ашиглах гэрчилгээгүй ашиглаж байгаа нь тогтоогдлоо. Мөн 23 СӨХ барилгын хувийн хэрэг хөтлөх, баримт бичгийн бүрдлийг хангахгүйгээс гадна зураггүй төсөлгүйгээр орон сууцны барилгад өргөтгөл хийсэн, зургаан өргөтгөлд нэмж зоорийн давхар хийсэн зөрчил илэрлээ.

Ноцтой нь өрөө тусгаарлах дундын 161 ханыг буулгасан байна. Нэгдүгээр давхрыг талбай болгосноос эвгүй байдал үүсвэл дээд айл цөмөрнө гэсэн үг.

Хоол үйлдвэрлэлийн үйл ажиллагаа явуулж байгаа 34 ресторан, цайны газруудаас 18 нь шингэрүүлсэн шатдаг хий баллоныг барилгад байрлуулсан байгаа бол 15 нь хий илрүүлэх дохиололгүй, 8 нь галын аюулгүй байдлын дүгнэлтгүй байна. Энэ нь хий алдагдах, тэсэрч дэлбэрэх нөхцөл байдал бүрдсэн байна.

1955-1968 онд баригдсан 40, 50 мянгатын 64 орон сууцны барилгын төлөвлөлт, үндсэн хийц бүтээц нь одоо мөрдөгдөж байгаа газар хөдлөлтийн бүс нутагт барилга төлөвлөх норм дүрмийн шаардлагыг хангахгүй байна.

Энэ зөрчлүүд маш ноцтой үр дагаврыг авчирч болзошгүй. Нийтдээ 300 гаруй иргэний амьдарч байгаа орчин эрсдэлтэй байна. Тиймээс холбогдох газруудад нэн даруй арга хэмжээ авах мэдэгдлийг хүргүүлсэн байгаа" гэсэн мэдээллийг өглөө. 

Монгол Улсын хэмжээнд 130 мянган барилга бий. Нийслэлд 117 000, орон нутагт 13 000 орчим байна.

Нийт барилгын 17 000 буюу 13 хувь нь газар хөдлөлтөд эрсдэлтэй гэж үнэлэгдсэн бол газар хөдлөлтөд тэсвэргүй 10 848 барилга байна. Үүний 8 767 нь нийслэлд, 2050 нь орон нутагт байна.

Б.Хэрлэн