Хотын иргэдийн өдөр тутмын зайлшгүй хэрэглээ бол нийтийн тээвэр. Нийслэл хотод автобусаар дунджаар 520 мянга гаруй иргэн зорчиж байна. Өглөөнөөс орой хүртэл иргэдэд үйлчилдэг нийтийн тээврийн салбарынхны асуудал өдөр бүр цахим орчинд цацагдах болжээ. Иргэд автобусны жолоочдыг "бохир, бүдүүлэг, ямар ч дүрэм журамд захирагдахгүй зоргоороо хөдөлгөөнд оролцдог" зэрэг үйлдэлд бухимдалтай ханддаг. Энгийн нэгэн өдөр тутмын жишээ дурдая. 

Дийд, дийд, диииийд...Хотын өглөө ингэж л эхэлдэг. Хаа сайгүй дуут дохио хангинана. Миний хувьд өглөө бүр 16-р хорооллоос автобусанд сууж ажилдаа явдаг. Өглөө автобусны хаалга онгойхтой зэрэгцэн иргэд бие, биетэйгээ уралдаж, түлхэлцсээр орцгооно. Ёстой л нэгийгээ үзэж, нэхий дээлээ тайлахдаа тулж байж арай гэж автобусандаа амжиж суув.Эцсийн буудлаас 30 гаруй хүн сууснаар автобус дүүрлээ. Цаашлаад 2-3 буудал явахад  хүмүүс нэмэгдсээр, автобусанд хөл тавих зай бүү хэл амьсгалах агааргүй болтлоо дүүрдэг. Ингээд л өглөөний стресс эхэлж байгаа юм.  

Үүнээс гадна  автобусны жолооч "Хүүе картаа дар, картаа дарахгүй бол зайлаач" гэх дуу хангинаж өгнө. Цаашлаад автобусны жолооч огцом  тоормослох үед иргэд  урагш ханарч, нэгнийхээ хөл дээр гишгэх, бие биеэ тохойлдсоноос болоод хэрүүл эхэлнэ. Зарим иргэд олон хүн тээвэрлэж яваа автобусны жолоочид зөөлөн явахыг сануулахад "Тийм их тав тухыг хүсээд байгаа юм бол таксиндаа суу” гэх мэт ёс бус үгсийг урсгаж өгнө. Мөн дээрээс нь тамхи татаж, утсаар чанга чанга ярих нь энгийн үзэгдэл болчихсон. Шаардлага тавихаар урдаас хэлж болох хамгийн муухай үгсээр харааж зүхдэг. Энэ мэт асуудлаас болж тэр автобусанд суусан ихэнх иргэд хамаг уур бухимдлаа бардаг нь нууц биш.

Нийслэлд өдөр тутамд 942 автобус иргэдэд үйлчилдэг. Хөдөлмөрийн тухай хуулиар нэг автобусанд өдөртөө хоёр ээлжийн жолоочоос гадна бэлтгэл жолооч бас хэрэгтэй. Ингээд бодвол нийтийн тээврийн үйлчилгээнд дор хаяж 3000 орчим жолооч ажиллах шаардлагатай. Гэвч  жолооч нарын тоо энэ хэмжээнд хүрэхээ больжээ. 

Нийтийн тээврийн салбарт удаан ажилласан жолооч ховор, жолооч нарын сэлгэлт их байгаа учраас харилцааны алдаа дутагдал гаргаж байгаа гэдгийг албаныхан нь ч үгүйсгэхээ больжээ. 

Харин автобусны жолоочдын хувьд, "Бидний хувьд ажлаасаа бүүх үедээ л нэг амс хийдэг. Янз бүрийн хүмүүс суудаг. Ажлын шаардлагын дагуу картаар үйлчлүүлэхийг шаарддаг. Гэтэл юу ч хэлэлгүй цаашаа яваад өгнө. Өндөр настай ах эгч нар орж ирээд яасан нь мэдэгдэхгүй загнахаа боддог. Жолоочдын хувьд ихэнх нь шантраад өөр ажилд ордог аргагүй шүү дээ. Бид чинь олон цагаар жолооны ард сууж, стрессдэж явж байгаа юм чинь яаж удаан тэсэх вэ дээ.  Бие махбодоороо бус сэтгэл санааны асар их хохиролд орж байна" гэсэн юм. 

Үүнээс харахад, автобусны жолоочдыг дор хаяж сардаа нэг удаа сэтгэлзүйчийн зөвлөгөө болон сургалтад хамрагдуулах хэрэгцээ шаардлага үүсэж байгааг илтгэж байна.