Юуны түрүүнд танд улаан, ногоон, цэнхэр өнгийн хувцас тохирно гэж хэлхээсээ өмнө та ямар өнгийн, ямар өнгө аястай (undertone) бүлэгт хамаарагдах вэ гэдгийг тодорхойлох нь зөв юм. Өөрт тохирсон өнгөө зөв тодорхойлж чадвал ямар өнгийн хувцас, нүүр будалт, үнэт зүйл таныг илүү өөртөө итгэлтэй эрүүл зөв төрхтэй харагдуулах вэ гэдгээ мэдэхэд илүү хялбар болох юм.Өөрт тохирсон өнгийг хэрхэн сонгох талаар стилист С.Эгшигтэй ярилцлаа. 

- Манайх шиг жилийн дөрвөн улиралтай эрс тэс уур амьсгалтай оронд хувцасаа тохируулж өмсөх нь их чухал. Бид улирлаа дагаж хувцасны өнгөө сонгох хэрэгтэй юу эсвэл зөвхөн өөрт зохисон өнгөөрөө хувцаслах нь зүйтэй юу? 

- Энэ хорвоо дээрх хамгийн гоё өнгө бол тухайн хүнд өөрт нь зохисон өнгө байдаг. Өнгө нь хүний сэтгэл зүй, бие махбодтой холбоотой. Хүний өнгө нүд, арьс үсээр тодорхойлогддог. Энэ нь тухайн хүнд байгалиас заяасан суурь өнгө юм. Тус үндсэн өнгө нь хэзээ ч өөрчлөгддөггүй. Өнгөнөөс хамаарч хүний харагдах байдал тодорхойлогддог. Шар төрлийн өнгөнүүд, ногоон, улаан, цэнхэр нь дулаандаа орно. Харин саарлын төрлийн өнгөнүүд хүйтэн өнгө юм. Өнгөний цуглуулга буюу палитруудыг улирлын нэрээр нэрлэх нь бий. Тиймдээ ч хавар, намрын өнгөнд дулаан өнгө орно. Зун, өвлийнхөд хүйтэн өнгө хамаарна. Тухайн хүн улирал бүрд өөрт таарсан өнгөө мэдээд авах хэрэгтэй. Үүний дараагаар тэр зохиосон өнгөөрөө хувцаслахад асуудалгүй болно.  

- Хүмүүс өнгөний талаар тодорхой мэдлэггүйгээс болж өөрт зохихгүй хувцасыг бүх насаараа өмсөх тохиолдол гардаг. Өнгөний зохицол бидний өдөр тутмын амьдралд хэрхэн нөлөөтэй вэ?

- Нүд, үс, арьсны суурь өнгөнд тулгуурлан өөрийн өнгөний хослолыг бүрдүүлэх уг арга нь 1920-иод оны үед АНУ-д анх бий болсон бөгөөд орчин үед стилистүүд ихээр зөвлөх болсон. Тухайн хүн шинэ тренд хувцаслалт, өнгө гарах гарах бүрт өөрийн биедээ наагаад хэрэггүй. Учир нь хүн өөрт зохицоогүй хувцасаа өмсөх нь таарахгүй хувцас өмссөнтэй ижил гэж ойлгож болно. Өөрт тохирохгүй өнгийн хувцас нь наснаасаа овортой, цог золбоогүй харагдуулдаг. Иймд нэг удаа өөрт тохирсон өнгөө тодорхойлуулах нь зүйтэй. 

- Өөрийнхөө өнгийг тодорхойлж зохицсон хувцас, нүүрний будаг хэрэглэх нь ямар ашиг тустай бол? 

-Өөрт тохирох өнгөө мэдэж авсанаар цаг хэмнэж, хувцас сонгоход хялбар болно. Мөн өнгөнөөс гадна хоорондоо зохицох хувцаснаас бүрдэх хувцасны шүүгээг ч үүсгэж чадна. Хувцас бурхан бие чөтгөр гэдэг шүү дээ. Таны бусдаас нуухыг хичээдэг биеийн хэсгийг өнгө хувцаслалтаар засаж болно. Жишээ болгож гурван өнгөний тухай тайлбарлая. 

Хар өнгө: Эл өнгийн хувцасыг албан ажлын үед болон махлаг мяраалаг хүмүүс өмсөх дуртай байдаг. Хүч чадал, дэг журам, хүчирхийлэлийг илэрхийлдэг. Тийм учраас цэрэг болон цагдаагын хүчний байгуллагууд өргөн хэрэглэдэг.зарим тохиолдолд уран хийц, чамин тансаг, уй гашуудал болон баяр ёслолын үед хэрэглэдэг. Өнгөний хаан гэгдэг.

Цагаан өнгө: Гэнэн томоогүй байдал эмзэг, цэвэр томоогүй, энх тайван, хүйтэн хөндий, анхаарал татахуйц өнгө юм.бусад өнгөтэй маш сайн хосолж чаддаг. Шинэ сэргэг зүйлийг сэдэгч, ирээдүйд тэмүүлэгч байдлыг илэрхийлдэг. Энэ өнгө нь хар, хөх саарал өнгөтэй их эвтэйхэн цохицдог. өнгөний хатан гэгддэг.

Хүрэн өнгө: Өдөр тутмын буюу амралтын тайвширалыг өгдөг. Мөн бат бөх суурьтай, буурьтай байдлыг илэрхийлдэг.

- Ярилцсанд баярлалаа