Палестины ХАМАС алан хядагч бүлэглэлийн дайчид Израилд гэнэтийн цохилт өгч, тус улс дайны байдалд шилжээд байна. Израилын Эрүүл мэндийн яамны сүүлийн үеийн мэдээллээр ХАМАС-ын халдлагын улмаас 2315 хүн шархадсанаас 23 хүний биеийн байдал нэн хүнд байгаа аж. Хоёр өдрийн дотор амиа алдсан хүний тоо 700-г давжээ. 

Тус улсад Монгол Улсын 200 гаруй иргэн байдаг аж. Гадаад харилцааны яамнаас монгол иргэдтэй холбогдож, гэрээсээ гарахгүй байх сануулгыг өгсөн байна. Одоогоор хохирсон монгол иргэн байхгүй бөгөөд иргэдээс нутаг буцах хүсэлт ирүүлээгүй байна.  

ИЗРАИЛ УЛСАД ОРШИН СУУГАА МОНГОЛ ИРГЭДИЙН АНХААРАЛД:

Израил Улсад үүсээд байгаа нөхцөл байдалтай холбогдуулан оршин суугаа газраасаа гарахгүй, олон нийтийн газраар зорчихгүй байх, израилын талын холбогдох байгууллагаас энгийн иргэдэд өгч буй зөвлөмж, анхааруулгыг чанд даган мөрдөж анхаарал болгоомжтой байхыг тус улсад оршин суугаа иргэддээ анхааруулж байна.

Хэрэв иргэн Танд яаралтай туслалцаа, дэмжлэг хэрэгтэй болвол

ГХЯ-ны +976-83042222,

Анкара дахь ЭСЯ-ны +90-5340128408,

Каир дахь ЭСЯ-ны +20-1120762664 дугаарын шуурхай утсаар болон dep10@mfa.gov.mn цахим шуудангаар холбогдоно уу.