Хараагүй хүмүүсийн хөдөлмөр сургалт, хөгжлийн төв"-ийн төлөөллүүд ХҮН намд мэдэгдэл хүргүүлж буй талаараа мэдээлэл хийлээ. 

Хараагүй хүмүүсийн ХСҮ-ийн захирал З.Болдсайхан

Манай хөдөлмөр сургалт хөгжлийн төв Хараагүй хүмүүсийг ажлын байртай болгох зорилгоор 1964 онд байгуулагдсан. Одоогоор манай төвд 80 гаран хүн ажиллаж байна. Үүний 80 хувь нь харааны бэрхшээлтэй хүмүүс байгаа. Мөн манай төвөөс гадна тэр объектод хараагүйчүүдийн МСҮТ ажиллаж байна. Жилд мөн дунджаар 80 оюутан МСҮТ-д суралцдаг. 

Манай объектод нийтдээ 240-250 хүн ажил хөдөлмөр эрхлэж, суралцдаг газар. Гэтэл биднийг "Жилд 80 хүн сурдаг", "Хашаанд нь Вьетнам засвар байдаг" илт худлаа ярьж байна. Энэ нь сүүлийн үед цахимаар тархаж хараагүй хүмүүсийн талаар буруу ойлголт нийгэм даяар тархаж байна. Бид үүнийг тэсэж тэвчихгүй. Тийм учраас ХҮН намын гишүүн мэдэгдэл хүргүүлж байгаа юм. Тус мэдэгдэлд: 

"Хараагүй хүмүүсийн хөдөлмөр сургалт хөгжлийн төв нь хараагүй иргэдийг тохирох ажлын байраар нь хангаж, нэгдсэн зохион байгуулалтаар хөдөлмөр эрхлүүлж, нийгмийн харилцаанд оролцоход нь бүх талын дэмжлэг үзүүлэх газар. ХҮН намын гишүүн Н.Энхчимэг нь сүүлийн үед цахим сувгаар болон олон нийтийн хэвлэл мэдээллийн хэрэгслүүдээр нийгэмд илт худал мэдээлэл түгээж байгууллага хамт олны нэр хүндэд халдах боллоо. Өнөөдөр нийслэл Улаанбаатар хотод сургууль цэцэрлэгийн асуудал хүнд байгаа нь үнэн боловч үүгээр далимдуулан харааны бэрхшээлтэй иргэдийн сурч боловсрох, бусдын адил нийгмийн харилцаанд оролцох эрх үүргийг үгүйсгэж тэднийг дорд үзэн балмад авирлаж байна. Иймд Нийслэлийн Баянгол дүүргийн ИХТ-ийн дарга ХҮН намын гишүүн Н.Энхчимэгт хариуцлага тооцож, Хараагүй хүмүүсийн хөдөлмөр сургалт, хөгжлийн төвийн хүмүүсээс албан ёсоор уучлалт гуйлгах, цаашид иймэрхүү асуудалд анхаархыг хүсэж байна" гэв.