Нийслэлчүүд оршуулгын газруудтайгаа хаяа дэрлэн амьдарсаар байна. Тухайлбал,  Далан давхар, Цагаан давааны оршуулгын газруудад хязгаарлалт хийгээгүй учир ийнхүү суурьшлын бүстэйгээ нийлсэн. 

Иймээс дээрх оршуулгын газруудыг цэцэрлэгт хүрээлэн болгох ажлыг хийж хэрэгжүүлэхээр болсон юм. Өнгөрсөн оноос Далан давхрын оршуулгын газарт дурсгалын цэцэрлэгт хүрээлэн байгуулах ажлыг эхлүүлсэн. Тэгвэл Баянзүрх дүүрэг дэх Цагаан давааны оршуулгын газарт мод тарихаар Улаанбаатар хотын Захирагчийн ажлын албанаас тендер зарласан байна.

Тендерийн төсөвт өртөг 450 сая төгрөг байх юм. Энэхүү ажил нь нийслэлийн төсвийн хөрөнгөөр хийгдэх бөгөөд Цагаан давааны төвлөрсөн цэгийн дэргэдэх 48 га оршуулгын газрыг ойжуулж, хамгаалалтын зурвас байгуулахаар төлөвлөсөн байна.