Дорнод аймгийн Хөгжлийн бэрхшээлтэй иргэдийн холбооны тэргүүн Д.Батхуяг Дорнод аймгаас Улаанбаатар хүртэлх замыг тэргэнцэрээр туулж, өнөөдөр Сүхбаатарын талбайд ирлээ. Тэрбээр 670 км замыг 20 хоногт туулжээ.

Тэрбээр “Хөгжлийн бэрхшээлтэй иргэдийн тухай хууль тогтоомжийг иргэдэд хүргэх, хаана байгаагаас үл хамаараад хүн бүхэн хуулиар тогтоосон эрхээ эдэлж, үүргээ биелүүлж, оролцоогоо нэмэгдүүлэх ёстой.  Тиймээс би шийдвэр гаргах түвшинд хөгжлийн бэрхшээлтэй иргэдийн дуу хоолойг хүргэж, эрхээ бодит болгох зорилготой явж байна.

Засгийн газар хөгжлийн бэрхшээлтэй иргэдийн эрхийг хангах, хамгаалах үүрэгтэй. Энэ үүргээ сайн биелүүлээч. Үүнд хөгжлийн бэрхшээлтэй иргэдийн оролцоо маш чухал. Бид тэтгэвэр тэтгэмж авч, халамж хүртэх хүмүүс биш.  Хөдөлмөр эрхлэх хэрэгтэй. Байнгын асаргаатай, ажил хийж чадахгүй хүмүүсийн тэтгэвэр, тэтгэмжийг нэмээд, хөдөлмөрлөж чадах хүмүүст Хөдөлмөрийн хуулийн 144 дүгээр заалтаар ажлын байртай болгох хэрэгтэй.  Энэ бүхэн үндэсний хэмжээнд сайн хэрэгждэггүй. ААНБ-ууд 25-аас дээш ажилтантай бол хөгжлийн бэрхшээлтэй иргэн ажиллуулна гэсэн боловч ажиллуулдаггүй.

Төр, засгийн удирдлагуудтай уулзаж, хөгжлийн бэрхшээлтэй иргэдийг ажилд авдаг болгож өгөөч, тэр хүнийг байнгын ажлын байртай болгож өгөөч гэсэн хүсэлт тавина. Ийм зорилгоор “Бид чадна” гэсэн уриатайгаар зориг гаргаж явлаа. Бид чадсан гэж буцмаар байна.

Манай Дорнод аймагт 4000 гаруй хөгжлийн бэрхшээлтэй иргэн бий. Тэдний 3000 гаруй нь ажил хийх боломжтой. Гэтэл 200 гаруй хүн ажил хийж байна” гэв.

Мөн тэрбээр тэргэнцэрээр олон зуун км-ыг туулах хүндрэлтэй байсныг хэлж байна. Замын эвдрэл гэмтэл хэцүүгээс гадна жолооч нарын хүндэтгэлгүй, хурд хэтрүүлсэн байдал аминд эрсдэлтэй байсныг хэлэв.

Б.Хэрлэн