Өнгөрсөн сард “Гацуурт” компанийн ерөнхий захирал Л.Чинбат машинаараа адуутай залуус хөөж буй бичлэг нийгмийн сүлжээнд тархаж шүүмжлэл дагуулсан. Олон нийтийн бухимдлыг дагуулсан энэ бичлэг нийгмийн сүлжээнд тархсан цагаас хойш нэлээдгүй хугацааны дараа буюу зургадугаар сарын 19-нд цагдаагийн байгууллагаас мөрдөн шалгаж ажиллагаа явуулж эхэлсэн талаараа мэдээлсэн. 

Тодруулбал,  Сэлэнгэ аймгийн цагдаагийн газарт "Зүүнбүрэн сумын нутаг "Сүмийн булан" нэртэй газарт энэ сарын 15-ны өдөр 13.40 цагт иргэн Л.Чинбат нь тус сумын иргэн Б, М нарыг Тоёота Ланд Круйзер маркийн тээврийн хэрэгслээр хөөж мөргөсөн" гэх гэмт хэргийн шинжтэй гомдол, дуудлага мэдээллийн дагуу шалгаж эхэлсэн байдаг.

Уг мэдээллийн дагуу иргэн Л.Чинбатын  үйлдэлд Эрүүгийн хуулийн тусгай ангийн 10.1, 13.14, 20.16 зүйлд зааснаар хэрэг бүртгэлтийн хэрэг нээж, мөрдөн шалгах ажиллагаа явуулж эхэлжээ. 

Энэ нь ЭРҮҮГИЙН ХУУЛИЙН 10.1 дүгээр зүйл Хүнийг алах, 13.14 дүгээр зүйл Худал мэдээлэл тараах, 20.16 дугаар зүйл Олон нийтийн амгалан тайван байдал алдагдуулах гэх заалтууд юм. 

Тэгвэл сар гаруй хугацааны дараа уг хэргийг талаар иргэн Л.Чинбат ам нээж, өөрийгөө буруугүй байсан мэтээр тайлбарлаж ядаж байгаа харагдав. Гэхдээ иргэн Л.Чинбат таны уур омгоо багтааж ядан нутгийн иргэдийн амгалан тайван байдлыг алдагдуулж, бусдын амь насанд нь эрсдэлтэй үйлдэл хийж байгаад нийтээрээ харсан. Гэтэл сар гаруй хугацааны дараа гарч ирснээ "Гэмгүй" гэж зогсох хүн ёсны үйлдэл мөн үү? 

Гэхдээ Л.Чинбат танд сануулахад МОНГОЛ УЛС хуультай орон. Энэ нь хүн бүрт хууль үйлчлэх ёстой. Иймээс таны өөрийгөө хамгаалан ярьж, арьсаа хамгаалж байгаагаар биш  хавтаст хэрэгт цугларсан нотлох баримтын хүрээнд шүүх шийдвэр гарна. Мөн танд сануулахад  ЭРҮҮГИЙН ХУУЛИЙН гурван зүйл ангиар хэрэг нээж, яллах дүгнэлт үйлдэн  хэргийг тань шүүхэд шилжүүлэхээр цагдаагийн байгууллагаас прокурорын хяналтад хүргүүлчихсэн. 

П.ГОО