Долоон машин мөргөж, хоёр хүүхэд гэмтээсэн иргэн Ч.Маралмаад шүүхээс тээврийн хэрэгсэл жолоодох эрхийг гурван жилээр хасах, зорчих эрхийг хоёр жилээр хязгаарлах ял оноосон. Гэвч түүнийг ямар нэг цахим гавгүй ХУД-ээс өөр дүүрэгт сул чөлөөтэй явж байгаа бичлэг нийгмийн сүлжээнд тархаад байна. 

Шүүхийн шийдвэр яагаад биелэгдэхгүй байгаа талаар холбогдох албаны хүнээс тодруулахад "Ч.Маралмаа нь Улсын дээд шүүхэд гомдол гаргасан учраас анхан шатын шүүхийн шийдвэр түдгэлзсэн. Иймээс шүүхээс хяналт тавиагүй байна. Анхан шатны шүүхийн шийтгэх тогтоол хүчин төгөлдөр болсны дараа шүүгчдэгч Ч.Маралмаагийн зорчих эрхийг хязгаарлах ялыг биелүүлнэ" гэх тайлбарыг өглөө. 

Тэгвэл энэ сарын 5-нд Дээд шүүхээс Ч.Маралмаад холбогдох хэргийг хэлэлцүүлэхээс татгалзсан. Нэг үгээр  түүнд оноосон тээврийн хэрэгсэл жолоодох эрхийг гурван жилээр хасах, зорчих эрхийг хоёр жилээр хязгаарлах шийдвэрт өөрчлөлт орохгүй гэсэн үг.  

Энэ талаар Дээд шүүхээс " Улсын дээд шүүхийн эрүүгийн хэргийн танхимын нийт шүүгчийн хуралдаанаар энэ сарын 5-ны өдөр шүүгдэгчийн гаргасан гомдлыг хянан хэлэлцээд хэлэлцүүлэхээс татгалзаж шийдвэрлэсэн байна. Энэхүү тогтоол нь албажсан. Албажсан тогтоолыг гомдол гаргагчид гардуулж өгсөн. Өнөөдөр хэргийг боогоод анхан шатны шүүхэд хүргүүлэхээр ажиллаж байна. Албажсан тогтоол анхан шатны шүүхэд хүргүүлсний дараа 5 хоногийн дотор шийдвэр гүйцэтгэх байгууллагад хүргүүлнэ" гэлээ.