Хятадын аялал жуулчлалын томоохон компани болох Trip.com Group ажилтнуудынхаа нийгмийн хангамжийн тал дээр томоохон алхам хийж, тус компанид ажилладаг хүмүүс бүл нэмж хүүхэдтэй болсон тохиолдолд хүүхэд бүрийн тоогоор мөнгөн тэтгэмж олгохоор болжээ.

Тодруулбал, Trip.com Group ажилтнуудынх нь гэрт бүл нэмсэн бол хүүхэд бүрийн тоогоор жил бүр 10 мянган юань буюу 1,4 мянган доллар олгох юм байна. Компанид гурваас дээш жил ажилласан хүмүүс энэ урамшууллыг хүүхдээ 5 нас хүртэл авах гэнэ. Энэ хөтөлбөр 2023 оны долдугаар сарын нэгний өдрөөс эхлэн тус компанийн дэлхий даяарх салбарт ажиллаж буй бүх ажилтнуудад хүйс хамаарахгүйгээр үйлчлэх аж. 

SCMP сонины мэдээлснээр, Хятадын арилжааны компаниуд дундаас ийм санаачилга гаргасан анхны компани нь Trip.com Group болж байгаа аж. Өмөн нь гагцхүү төрийн болон орон нутгийн эрх баригчид л хүн амын өсөлтийг дэмжсэн төрөл бүрийн төслүүдийг санал болгож байв. Хятад улс ийнхүү хүн амын өсөлтөд онцгой анхаарах болсон нь 2022 оны дүнгээр тус улсын хүн ам сүүлийн 60 жилийн хугацаанд анх удаа буурсан дүнтэй гарсантай холбоотой юм.

Г.Бямбасүрэн