Ромын пап Франциск Стокгольмд Коран судар шатаасан зэрэг үйлдэлд гутаж байгаагаа илэрхийлжээ. Бусдыг доромжлохын тулд эрх чөлөөг ашиглаж байгаа нь байж болшгүй хэрэг хэмээн тэрбээр мэдэгдсэн байна.
"Би ийм үйлдлийг хараад үнэхээр дургүйцэж, гутаж байна. Ард түмэн ариун гэж дээдлэж буй ямар ч ном сударт хүндэтгэлтэй хандаж, сүсэгтнүүдийг хүндлэх ёстой. Үг хэлэх эрх чөлөөг бусдыг гутаан доромжлох шалтаг болгон ашиглаж болохгүй" хэмээн Ромын пап мэдэгджээ.
Энд дуулгахад, Стокгольм хотын төвд Иракаас цагаачилсан 37 настай Салван Момика гэх эр цагдаагийнхны зөвшөөрлийг авч, хотын төвд байх сүмийн ойролцоо Коран судрыг шатаасан юм. Тэрбээр энэ үеэрээ Коран судрыг урж, номын хуудсаар гутлаа арчиж, мусульман шашинтнууд идэхийг цээрлэдэг гахайн махыг номон дээр тавьж, судрыг шатаасан. Эрх баригчид энэ үйлдлийг "зөвшөөрөгдсөн арга хэмжээ" хэдий ч зохисгүй үйлдэл хэмээн мэдэгдэж байв. Ирак Коран судар шатаасан цагаачийг хүлээлгэн өгөхийг Шведээс шаардсан бол Багдад хотод эсэргүүцэгчид Шведийн элчин сайдын яам руу дайрчээ.
Г.Бямбасүрэн
| Уншиж байна |