Саудын Арабт эрх баригчдын зөвшөөрөлгүйгээр хаж мөргөл үйлдэх гэсэн хэргээр 17 мянга гаруй хүнийг саатуулжээ. Энэ талаар Нийгмийн аюулгүй байдлын албанаас авсан эх сурвалжтайгаар Саудын Арабын мэдээний агентлаг дамжуулсан байна. 

Мусульманчуудын ариун газар болох Мекка, Медина дахь хэсгүүдэд өнгөрсөн долоо хоногийн туршид хаж мөргөл болсон. Энэ мөргөлд хоёр сая гаруй сүсэгтэн оролцжээ. Мөргөлд оролцоход албан ёсны зөвшөөрөл авдаг бөгөөд энэ жил зохих зөвшөөрөл авалгүйгээр хаж мөргөлд оролцохыг завдсан хэргээр 17 615 хүнийг баривчилсан байна.

Тэдгээрийн 9509 нь оршин суух, ажиллах, хилийн аюулгүй байдлын журмыг зөрчсөн бол 33 хүн хаж мөргөл үйлдэх газар руу мөргөлчдийг хууль бусаар зөөсөн хэргээр саатуулагджээ.

Г.Бямбасүрэн