Францын Гадаад хэргийн сайд Катрин Колонна зургадугаар сарын 29-30-ны өдрүүдэд Монгол Улсад ажлын айлчлал хийнэ. Энэ үеэр уран олборлолтын талаар хэлэлцэнэ гэж Ройтерс агентлаг мэдээлжээ. 

Тодруулбал, Францын Гадаад хэргийн сайд Монголын эрх баригчидтай уран олборлох гэрээний төслийг хэлэлцэх төлөвлөгөөтэй байгаа бөгөөд энэ нь Orano цөмийн технологийн компанитай хийсэн хэлэлцээтэй холбоотой гэж эх сурвалж мэдээлсэн байна. Монгол Улс нөөцөөр баялаг, мөн ураны орд газруудыг бүрэн ашигладаггүй, тиймээс Монголын эрх баригчид зөвшөөрвөл энэ улс дахь ураны олборлолтын төсөл нэг тэрбум еврогоор үнэлэгдэнэ гэж Ройтерс онцолжээ. 

Монголд уран олборлох төслийг хэлэлцэх ажил ирэх намар хүртэл үргэлжлэх юм байна. Монголд зөвхөн уран төдийгүй өөр олон ашигт малтмалын баялаг нөөцтэй ордууд бий гэж Францын тал цохон тэмдэглэжээ.

Ройтерс агентлагийн бичсэнээр, Орано компани Монголд 25 жилийн туршид геологи хайгуулын ажил хийж байгаа, ашигт малтмал олборлох тусгай зөвшөөрөлтэй аж. Францын Гадаад хэргийн сайд Монголд айлчилснаар хамтын ажиллагааг өргөжүүлэх болон бусад чиглэлээр төслүүдийг хөгжүүлэх талаар хэлэлцэнэ гэж эх сурвалж онцолсон байна. 

Эргэн сануулахад, өнгөрсөн сард Францын Ерөнхийлөгч Эммануэль Макрон манай улсад анх удаагаа айлчилсан юм. Энэ айлчлалынхаа үеэр тэрбээр Монгол Улсын Ерөнхийлөгч У.Хүрэлсүхтэй уулзаж, Франц руу чухал металл нийлүүлэхээр тохиролцсон талаар Францын хэвлэлүүд мэдээлж байлаа. 

Г.Бямбасүрэн