Америкийн жүжигчин Кевин Спейситэй холбогдох хэргийн шүүх хурал  Лондон хотноо эхэлжээ. Шүүх хурлын сонсгол хэдэн долоо хоног үргэлжилж, долдугаар сарын сүүлээр дуусна гэж МИР24 мэдээлсэн байна. Эх сурвалжийн мэдээлснээр, Спейси 12 зүйл ангиар буруутгагдаж байгаа гэнэ. Тэдгээрийн дунд хүчирхийлэл, зүй бус авир, бэлгийн дарамт зэрэг хэргүүд багтаж байгаа бөгөөд эдгээр хэргийн улмаас Оскарын шагналт жүжигчин сүүлийн жилүүдэд ямар ч кинонд тоглох боломжгүй болсон юм.

Харин одоо түүнийг бүх насаараа хоригдох ял хүлээж байгаа аж. Учир нь тэрбээр 2001-2013 онуудын хооронд олон хүнд бэлгийн дарамт үзүүлсэн хэрэгт буруутгагдаж байгаа. Анх 2017 онд жүжигчин Энтони Рэпп түүнийг бэлгийн дарамт үзүүлсэн хэрэгт буруутгасны дараа дахин 30 хүн түүнийг ийм хэрэгт буруутгасан. Энэ дуулианаас болж Спейси "Хөзрөн байшин" цувралд бүтээж байсан дүрээ алдаж, Холливудад кинонд тоглохоо больсон юм. 

Харин жүжигчин өөрөө гэм буруугаа хүлээхээс татгалзсан. Шүүх хурлын танхимд сэтгэгдэл өндөртэй ирж, өөрийг нь угтсан сэтгүүлчид рүү инээмсэглэн мэндчилсэн гэж МИР24 мэдээлжээ. Спейсид холбогдох хэргийн үндсэн сонсгол зургадугаар сарын 30-ны өдөр эхэлж, үүний дараа яллагч болон өмгөөлөгч талууд тангарагтны шүүгчдийн өмнө өөрсдийн үндэслэлийг танилцуулах аж.

2022 оны 10 дугаар сард Нью-Йоркийн тангарагтны шүүх жүжигчин Рэппд бэлгийн дарамт үзүүлсэн гэх Спейсигийн хэргийг цагаатгасан юм. Харин Их Британид Спейсигийн эсрэг 12 хэрэг үүсгэснээр бэлгийн дарамттай холбоотой дуулиан үргэлжилж байгаа аж. 

Г.Бямбасүрэн