Сүүлийн жилүүдэд католик сүмүүдэд бага насны хүүхдийг бэлгийн дарамтад оруулдаг, хүчирхийлдэг гэх мэдээлэл эрчээ авч, олон орон энэ мэдээлэлтэй холбоотойгоор мөрдөн шалгалтын ажил хийж, католик сүмийнхэн уучлалт гуйж байлаа. Энэ мэдээлэл дахин сөхөгдөж, зөвхөн Испанид гэхэд л католик сүмд бэлгийн хүчирхийллийн золиос болсон хүүхдийн тоо 2000 орчим, үүнд 1000 гаруй санваартан холбогдсон гэж El Pais сонин мэдээлжээ. 

Сонины редакци Испани дахь католик сүмд гарсан хэрэгтэй холбоотойгоор эрэн сурвалжлах материал бэлдсэн байна. Сэтгүүлчдийн олж мэдсэнээр, хүүхэд хүчирхийлж байсан 1000 гаруй санваартны 75 нь хөвгүүд, 14 хувь нь охидыг хүчирхийлсэн бол үлдсэн нь эрэгтэй, эмэгтэй хүүхдийн аль алиныг хүчирхийлж байсан гэнэ. Бага насны хүүхдийг садар самуунд уруу татах явдал 1960-аад онд оргилдоо хүрсэн бол хамгийн анхны тохиолдол 1927 онд бүртгэгджээ. Испанийн 70 сүмээс ердөө 12-т нь л нэг ч удаа бага насны хүүхдийг садар самуунд уруу татсан хэрэг бүртгэгдээгүй байна. 

Эх сурвалжийн онцолсноор, сүмийн төлөөлөгчид бага насны хүүхдүүдийг садар самуунд уруу татсан хэргийг нуун дарагдуулах гэж хичээж байсан гэнэ. Тэдгээр нь дээд тушаалын санваартнууд байсан бөгөөд ийм хэрэгт орооцолдсон төлөөлөгчдөө ихэвчлэн хилийн чанад руу илгээдэг байсан аж.

Г.Бямбасүрэн