Японы өмнөд зүгт байх Наго хотын эрэг дагуу тэнгисийн ус улаан хүрэн өнгөтэй болжээ. Тэнгисийн ус улаан өнгөтэй болсон нь энэ хотод байх үйлдвэрийн осолтой холбоотой гэнэ. Энэ талаар Блүмберг агентлаг мэдээлсэн байна.

Тодруулбал, Orion Breweries компанийн шар айрагны үйлдвэрт шар айраг нэрэх төхөөрөмжийн температурыг зохицуулахад ашигладаг хөргөгч шингэн алдагдаж, ойролцоох гол руу оржээ. Үүссэн ослын хор уршгийг арилгаж дууссан бөгөөд шар айрагны үйлдвэрийг эзэмшигч компани иргэдээс уучлалт гуйж, дахин ийм алдаа давтахгүй хэмээн амласан байна. 

Окинава таймс сонины мэдээлснээр, хөргөгч шингэн гол, тэнгист алдагдсанаар хүрээлэн буй орчинд ноцтой нөлөө үзүүлэхгүй гэж нутгийн эрүүл мэндийн газрын мэргэжилтэн өгүүлжээ. Хөргөгч шингэн болох пропиленгликолийг хүнсний нэмэлт, эм болон гоо сайхны үйлдвэрлэлд ч ашигладаг бөгөөд аюулгүй бодис гэж хүлээн зөвшөөрөгдсөн байдаг аж. ,

Г.Бямбасүрэн