2023 оны тавдугаар сарын байдлаар 110 сая хүн сөргөлдөөн, хавчлага, хүний эрхийн зөрчлөөс үүдэн орон гэрээ орхин дүрвэхээс аргагүй болсон гэж НҮБ-ын Дүрвэгчдийн асуудал эрхэлсэн Дээд комиссар Филиппо Гранди мэдэгджээ. 

НҮБ-ын мэдээлснээр, 2022 онд дэлхий даяар 104,8 сая хүн дүрвэгч болсон нь 2021 онтой харьцуулахад 19,1 сая хүнээр өссөн үзүүлэлт аж. Энэ тоонд Орос Украин руу түрэмгийлснээс үүдэн орон гэрээ орхихоос аргагүй болсон 11 сая хүн багтаж байгаа бөгөөд энэ нь Дэлхийн II дайнаас хойших хамгийн том цагаачлалын урсгалд тооцогдож байна. Харин 2023 онд Судан дахь сөргөлдөөнөөс үүдэн дүрвэгчдийн урсгал дахин нэмэгдэж, улмаар энэ оны тавдугаар сар гэхэд дүрвэгчдийн тоо 110 саяд хүрчээ. 

2023 оны дөрөвдүгээр сараас эхэлсэн Суданы дайны улмаас хоёр сая гаруй хүн дүрвэсэн бол Конго, Эфиоп, Мьянмар дахь сөргөлдөөн 2022 онд эдгээр улс тус бүрээс нэг сая хүн дүрвэх шалтгаан болжээ. Дүрвэгчдийн гуравны хоёр нь улс дотроо байршлаа сольсон бол үлдсэн 35 сая хүн бусад орныг зорьсон байна.

Г.Бямбасүрэн