Өнгөрсөн долоо хоногийн засгийн газрын хуралдаанаар авто зам засвар арчлалтын үйлчилгээ эрхлэгч 20 ААН ашиггүй ажиллаж байна гэх үндэслэлээр нэгтгэх шийдвэр гаргасан. "Авто зам засвар арчлалт" ТӨХК-иас 20 байгууллагыг нэгтгэхийг эсэргүүцэж буй талаар Монголын авто замчдын ҮЭ-ийн холбооноос мэдээлэл өглөө. 

Монголын авто замчдын ҮЭ-ийн холбооны дарга Б.Цэрэнпүрэв

Авто замын АЗЗА-ын компаниуд хамгийн бага нь 40-60 жил болчихсон компаниуд байдаг. Дээр гаргасан шийдвэр бол нэгдүгээрт нийгэмд хортой бөгөөд иргэд хэрэглэгчийн аюулгүй байдлыг алдагдуулах шийдвэр болсон. Хоёрт  авто замчдын төрийн өмчийн компанид хамгийн багадаа 30-40 хүн ажиллаж байгаа. Мөн хувийн хэвшлийн найман компанид 8-10 хүн л ажилладаг. Тиймээс эдгээр ажилчдын нийгмийн хамгаалал, ажлын байрны баталгаа алдагдах юм. 

21 аймагт үйл ажиллагаа явуулж байгаа авто зам засвар, арчлалт(АЗЗА)-ын 20 компанийг нэгтгэх шийдвэр Засгийн газрын хуралдаанаас гарлаа. Ийнхүү тус бүрдээ 1.5 орчим тэрбум төгрөгийн үнэлгээтэй 20 авто зам засвар, арчлалтын компанийг нэгтгэж, нийт 38 тэрбум төгрөгийн үнэлгээтэй компани болгон өөрчлөн байгуулж байна. Ийнхүү нэгтгэсний дараа олон нийтэд хувьцаа гаргах шийдвэр гарсан. 

АЗЗА компаниудыг 20-иод жилийн өмнө нэгтгэж байсан удаатай. Нэгтгэсний дараагаар энэ нь боломжгүй юм байна. Тиймээс тус тусдаа статустай компани байх ёстой гээд тусад нь гаргаад явсан байдаг. 

Мөн АЗЗА-ууд ашиг олдоггүй. Жишээ нь: Улсын төсөвт олон улсын дэлхийн байгууллага, Азийн хөгжлийн банкнаас гаргасан судалгаагаар 100 тэрбум төгрөгөөр улсын чанартай авто замын засвар арчлалт хийнэ гэж тооцоо гаргасан байдаг. Гэтэл улсаас 35 тэрбум төгрөгийг баталж өгдөг. Энэ мөнгөө баталж өгөөд, хувьцаа гаргаад дээрээс нь ашиг олно гэж ярьж байна. Үүнээс гарах үр дагавар нь засвар арчлалт чанаргүй, зам эзэнгүй болох мөн иргэд чанаргүй зам дээр аюул осолд орж амь насанд том хэмжээний хохирол учрах эрсдэлтэй болно гэж үзэж байна. 

Улсын чанартай автозамыг эзэнгүйдүүлэх, зам хариуцагч нь замаа засахгүй, барилга барьж ашгийн төлөө гүйж, зам замын байгууламжийн бэлэн байдалд сөргөөр нөлөөлж, иргэдийн амь нас, ачаа тээврийн аюулгүй байдалд сөргөөр нөлөөлнө гэж үзэж байгаа.

Орон нутгийн АЗЗА-ын 20 компанийн ажилчдын 60 орчим хувь нь  10-аас дээш жил ажилласан ажилтнууд аж.  Ажилтнуудын ажлын байрыг хэрхэн хадгалах, нийгмийн асуудлыг хэрхэн шийдвэрлэх вэ зэрэг асуудлыг хэвлэлийн хурлын үеэр онцолж байлаа.